ମନ୍ତ୍ରୀଙ୍କ ବିଭିନ୍ନ କାର୍ଯ୍ୟାଳୟକୁ ଅଚାନକ ଗସ୍ତ

ଅନୁପସ୍ଥିତ ଥିବା କର୍ମଚାରୀଙ୍କୁ କୈଫିୟତ୍‌ ତଲବ

ଭୁବନେଶ୍ୱର: କୃଷି ଓ କୃଷକ ସଶକ୍ତିକରଣ, ମତ୍ସ୍ୟ ଓ ପ୍ରାଣୀସଂପଦ, ଉଚ୍ଚଶିକ୍ଷା ମନ୍ତ୍ରୀ ଡ. ଅରୁଣ କୁମାର ସାହୁ ଆଜି ଅଚାନକ କୃଷି ବିଭାଗର ବିଭିନ୍ନ କାର୍ଯ୍ୟାଳୟ ଗସ୍ତ କରିଥିଲେ ।

ମନ୍ତ୍ରୀ ଡ. ସାହୁ ପୂର୍ବାହ୍ନରେ ବରମୁଣ୍ଡାସ୍ଥିତ ଉପନିର୍ଦ୍ଦେଶକ, ପ୍ଲାଣ୍ଟ ପ୍ରୋଟେକସନ୍‌ କାର୍ଯ୍ୟାଳୟ, ରାଜ୍ୟ ବାୟୋ ଫର୍ଟିଲାଇଜର ଟେଷ୍ଟିଂ ଲାବୋରେଟୋରୀ, ଓଡ଼ିଶା ରାଜ୍ୟ ସିଡସ୍‌ ଓ ଅର୍ଗାନିକ ପ୍ରଡକ୍ଟ ସାର୍ଟିଫିକେସନ୍‌ ଏଜେନ୍ସି ଓ କ୍ଷେତ୍ର ବିଜ୍ଞାନୀ, କ୍ଷୁଦ୍ର ଜଳସେଚନ ଓ ଜଳବିନିଯୋଗ ତାଲିମ ପ୍ରତିଷ୍ଠାନରେ ପହଞ୍ଚିଥିଲେ ।

ମନ୍ତ୍ରୀ ଡ. ସାହୁ କର୍ମଚାରୀମାନଙ୍କୁ କାର୍ଯ୍ୟକ୍ଷେତ୍ରରେ ସମୟାନୁବର୍ତ୍ତିତା ଓ ପାରଦର୍ଶିତା ପ୍ରଦର୍ଶନ ପାଇଁ ପରାମର୍ଶ ଦେଇଥିଲେ । ପରିଦର୍ଶନ ସମୟରେ ବିଭିନ୍ନ କାର୍ଯ୍ୟକ୍ରମର ରୂପାୟନ ଓ କାର୍ଯ୍ୟକାରିତା ଉପରେ ପଚାରି ବୁଝିବା ସହିତ ବିଳମ୍ବରେ ଆସିଥିବା କର୍ମଚାରୀମାନଙ୍କୁ ତାଗିଦ୍‌ କରିଥିଲେ ।

ଏଥି ସହିତ ଅନୁପସ୍ଥିତ ଥିବା କର୍ମଚାରୀଙ୍କୁ କୈଫିୟତ୍‌ ତଲବ କରି କାର୍ଯ୍ୟାନୁଷ୍ଠାନ ଗ୍ରହଣ ନିମନ୍ତେ ଅଧିକାରୀମାନଙ୍କୁ ନିର୍ଦ୍ଦେଶ ଦେଇଥିଲେ ।