ସ୍ମିତାରାଣୀଙ୍କ ପରିବାରବର୍ଗଙ୍କୁ ସୁରକ୍ଷା ଓ ନ୍ୟାୟ ଦେବାରେ ମୁଖ୍ୟମନ୍ତ୍ରୀ ସଂପୂର୍ଣ୍ଣ ବିଫଳ

ଯାଜପୁର ଏସ୍.ପି ଓ ତଦନ୍ତ ଅଧିକାରୀଙ୍କୁ ତୁରନ୍ତ ବଦଳି କରାଯାଉ

ଭୁବନେଶ୍ୱର : ଓଡ଼ିଶା ପ୍ରଦେଶ କଂଗ୍ରେସ କମଟି ସଭାପତି  ନିରଞ୍ଜନ ପଟ୍ଟନାୟକଙ୍କ ନିର୍ଦେଶ କ୍ରମେ ତଥ୍ୟ ଅନୁଧ୍ୟାନ କମିଟି ଅଧ୍ୟକ୍ଷ ବାରବାଟୀ କଟକ ବିଧାୟକ ଇଂ ମହମ୍ମଦ ମୋକିମ୍  ଙ୍କ ନେତୃତ୍ୱରେ ଏକ ୧୨ଜଣିଆ କଂଗ୍ରେସ ପ୍ରତିନିଧି ମଣ୍ଡଳୀ କଟକ ବକ୍ସିବଜାରସ୍ଥ ପୋଲିସ ମହାନିର୍ଦ୍ଦେଶକଙ୍କ କାର୍ଯ୍ୟାଳୟରେ ତାଙ୍କ ଅନୁପସ୍ଥିତିରେ ଅତିରିକ୍ତ ପୋଲିସ୍ ମହାନିର୍ଦ୍ଦେଶକଙ୍କୁ  ସାକ୍ଷାତ କରି ସ୍ୱର୍ଗତ ସ୍ମିତାରାଣୀ ବିଶ୍ୱାଳଙ୍କ ମୃତ୍ୟୁ ରହସ୍ୟର ସଠିକ୍ ତଦନ୍ତ କରିବାରେ ଯାଜପୁର ଜିଲ୍ଲା ପ୍ରଶାସନର ବିଫଳତା ଓ ଜିଲା ଆରକ୍ଷୀ ଅଧ୍ୟକ୍ଷକଙ୍କ ଅବହେଳା, ଅନାବଶ୍ୟକ ଚରିତ୍ର ସଂହାର ବୟାନବାଜି ସ୍ୱର୍ଗତା ବିଶ୍ୱାଳଙ୍କ ରହସ୍ୟଜନକ ମୃତ୍ୟୁଘଟଣାର ସଠିକ୍ ତଦନ୍ତର ପର୍ଦାଫାଶ କରିବାରେ ଅନ୍ତରାୟ ସୃଷ୍ଟି କରିଛି ।

ଶାସକ ଦଳର ବହୁ ବଡ଼ପଣ୍ଡାଙ୍କୁ ଘଣ୍ଟ ଘୋଡ଼ାଇବାରେ ଉପରୋକ୍ତ ପ୍ରଶାସନିକ କର୍ତୃପକ୍ଷ ତଦନ୍ତର ଦିଗକୁ ପ୍ରଭାବିତ କରୁଛନ୍ତି ବୋଲି କଂଗ୍ରେସ ପ୍ରତିନିଧି ମଣ୍ଡଳୀ ଅତିରକ୍ତ ପୋଲିସ୍ ମହାନିର୍ଦ୍ଦେଶକଙ୍କୁ ଅବଗତ କରାଇଛନ୍ତି ।

ଅବିଳମ୍ବେ ଯାଜପୁର ଜିଲା ଆରକ୍ଷୀ ଅଧିକ୍ଷକ ଓ ତଦନ୍ତ ଅଧିକାରୀଙ୍କୁ ବଦଳି କରିବାକୁ କଂଗ୍ରେସ ପ୍ରତିନିଧିମଣ୍ଡଳୀ ଦାବି କରିଛନ୍ତି ।

ରାଜ୍ୟ ମାନବାଧିକାର ଆୟୋଗ ଅଧ୍ୟକ୍ଷଙ୍କ ନିର୍ଦ୍ଦେଶକୁ ଜିଲା ଆରିକ୍ଷୀ ଅଧିକ୍ଷକ (ଏସ୍ପି) ଯାଜପୁର ଅବମାନନା ଓ ବେଖାତିର କରିବା ଦ୍ୱାରା ପୀଡ଼ିତାର ପରିବାରବର୍ଗ ଜୀବନ ପ୍ରତି ସଂପୂର୍ଣ୍ଣ ଭୟର ଦୃଢ଼ତା ଗଣମାଧ୍ୟମରେ ପ୍ରକାଶ କରି ବାଧ୍ୟହୋଇ ଭିଟାମାଟି ଛାଡ଼ିବା ଘଟଣା ସଂପ୍ରତି ରାଜ୍ୟରେ ରାଜ୍ୟ ସରକାରଙ୍କର ଦାୟିତ୍ୱହୀନତାର ଏକ ନଗ୍ନ ଉଦାହରଣ ସୃଷ୍ଟିକରିଛି ।

ଏପରି ସ୍ଥଳେ ଅବିଳମ୍ବେ ପରିବାର ବର୍ଗଙ୍କୁ ପୋଲିସ ମହାନିର୍ଦ୍ଦେଶକ ଖୋଜି ବାହାର କରିବା, ସଂପୂର୍ଣ୍ଣ ସୁରକ୍ଷାବଳୟ ଭିତରେ ପରିବାର ବର୍ଗଙ୍କୁ ସ୍ୱଗୃହକୁ ଫେରାଇ ଆଣିବା, ପ୍ରତ୍ୟକ୍ଷ ଓ ଅପ୍ରତ୍ୟକ୍ଷ ଭାବେ ଉକ୍ତ ଘଟଣା ସହ ସଂପୃକ୍ତ ବ୍ୟକ୍ତିବିଶେଷଙ୍କ ବିରୁଦ୍ଧରେ ଦୃଢ଼ ଆଇନଗତ କାର୍ଯ୍ୟାନୁଷ୍ଠାନ ନେବାକୁ କଂଗ୍ରେସ ପ୍ରତିନିଧି ମଣ୍ଡଳୀ ଅତିରିକ୍ତ ପୋଲିସ୍ ମହାନିର୍ଦ୍ଦେଶଙ୍କ ନିକଟରେ ଦାବି କରିବା ସହ ପୋଲିସ୍ ମହାନିର୍ଦ୍ଦେଶକଙ୍କ ଉଦ୍ଦେଶ୍ୟରେ ଏକ ସ୍ମାରକ ପତ୍ର ଅତିରିକ୍ତ ପୋଲିସ୍ ମହାନିର୍ଦ୍ଦେଶକଙ୍କୁ ପ୍ରଦାନ କରିଛନ୍ତି ।

ଏହି କଂଗ୍ରେସ ପ୍ରତିନିଧି ମଣ୍ଡଳୀରେ ସର୍ବଶ୍ରୀ ବିଧାୟକ ମହମ୍ମଦ ମୋକିମ୍, ଶ୍ରୀମତୀ ବିଜୟଲକ୍ଷ୍ମୀ ସାହୁ, ନିଶିକାନ୍ତ ମିଶ୍ର, ପଦ୍ମାକର ଗୁରୁ, ରଜନୀ ମହାନ୍ତି, ଦୀପକ ମହାପାତ୍ର, ନରେଶ ମହାନ୍ତି, ଜିନେଶ ଦାସ, ଗିରିବାଳା ବେହେରା, ଶୈଳବାଳା ଜେନା, ବିଶ୍ୱଜିତ୍ ଦାସ ଓ ନିକୁଞ୍ଜ ପଶାୟତ ପ୍ରମୁଖ ଉପସ୍ଥିତ ଥିଲେ ।

ଉକ୍ତ ଘଟଣାକୁ ଆଧାର କରି କଂଗ୍ରେସ ଭବନ, ଭୁବନେଶ୍ୱର ଠାରେ  ସତ୍ୟ ପ୍ରକାଶ ନାୟକ, ପଦ୍ମାକର ଗୁରୁ, ଶୁଭଶ୍ରୀ ପଣ୍ଡା ଓ ନରେଶ ମହାନ୍ତି ଏକ ସାମ୍ବାଦିକ ସମ୍ମିଳନୀ ଜରିଆରେ ସ୍ୱଗତା ସ୍ମିତାରାଣୀ ବିଶ୍ୱାଳ ପରିବାରବର୍ଗଙ୍କୁ ତୁରନ୍ତ ଠାବ କରି ସଂପୂର୍ଣ୍ଣ ସୁରକ୍ଷାର ସହ ସେମାନଙ୍କର ପୈତୃକ ବାସଭବନକୁ ଫେରାଇ ଆଣିବା ଓ ସେମାନଙ୍କୁ ସୁରକ୍ଷା ଯୋଗାଇ ଦେବାରେ ଏସ୍ପି ଯାଜପୁରଙ୍କର ଚରମ ଅବହେଳା ଓ ବିଫଳତାକୁ ଆଧାରକରି ଅବିଳମ୍ବେ  ଚରଣସିଂ ମିନା ଓ ଉକ୍ତ ଘଟଣାର ତଦନ୍ତ ଅଧିକାରୀଙ୍କୁ ବଦଳି କରିବା ସହ ଘଟଣାର ବିଚାର ବିଭାଗୀୟ ଓ ସିବିଆଇ ତଦନ୍ତ ନିମନ୍ତେ  ମୁଖ୍ୟମନ୍ତ୍ରୀଙ୍କୁ ବାରମ୍ବାର ଦୃଷ୍ଟିଆକର୍ଷଣ କରିଥିଲେ ବି ନବୀନ ବାବୁଙ୍କ ନିରବତା ରାଜ୍ୟ ସରକାରଙ୍କର ମୋ ସରକାର କେମିତି ଚାଲିଛି ଏହା ସ୍ପଷ୍ଟ ଅନୁମେୟ  ବୋଲି କହିଥିଲେ ।

ଏପରି ସ୍ପର୍ଷକାତର ଘଟଣାର ପର୍ଦାଫାଶ ନହେଲା ପର୍ଯ୍ୟନ୍ତ ପିସିସି ସଭାପତି  ନିରଞ୍ଜନ ପଟ୍ଟନାୟକଙ୍କ ନେତୃତ୍ୱରେ କଂଗ୍ରେସ ଦଳ ବିଧାନସଭା ଭିତରେ ଓ ବିଧାନସଭା ବାହାରେ ରାଜ୍ୟର ମା, ମାଉସୀ, ଭଉଣୀଙ୍କ ସୁରକ୍ଷା ପାଇଁ ଆନ୍ଦୋଳନ ଜାରି ରଖିବ ବୋଲି ଶ୍ରୀଯୁକ୍ତ ନାୟକ, ଶ୍ରୀଯୁକ୍ତ ଗୁରୁ, ଶ୍ରୀଯୁକ୍ତ ମହାନ୍ତି ଓ ଶ୍ରୀମତୀ ପଣ୍ଡା ରାଜ୍ୟସରକାରଙ୍କୁ ଚେତାବନୀ ଦେଇଛନ୍ତି ।

ଉକ୍ତ ସାମ୍ବାଦିକ ସମ୍ମିଳନୀକୁ  ଦୀପକ ମହାପାତ୍ର ସଂଯୋଜନା କରିଥିଲେ ।

RELATED BY