ଝାରସୁଗୁଡ଼ା : ସ୍ୱଚ୍ଛ, ସୁନ୍ଦର ଓ ସବୁଜ ଝାରସୁଗୁଡ଼ା ଗଠନ ଦିଗରେ ଆଜି ଝାରସୁଗୁଡ଼ା ଜିଲ୍ଲା ପ୍ରଶାସନ ପକ୍ଷରୁ ‘ମେଗା ସ୍ୱଚ୍ଛ ଝାରସୁଗୁଡ଼ା ଅଭିଯାନ’ ମହାସମାରୋହରେ ଅନୁଷ୍ଠିତ ହୋଇଯାଇଛି । ଆଜି ସକାଳ ୭ଟାରୁ ସହରର ୫୦ଟି ନିର୍ଦ୍ଧାରିତ ସ୍ଥାନରେ ଆୟୋଜିତ ଏହି ମହା ସ୍ୱଚ୍ଛତା ଅଭିଯାନରେ ଝାରସୁଗୁଡ଼ାର ବିଧାୟକ ଶ୍ରୀଯୁକ୍ତ ଟଙ୍କଧର ତ୍ରିପାଠୀ ଏବଂ ଜିଲ୍ଲାପାଳ ଶ୍ରୀ କୁଣାଲ ମୋତିରାମ ଚହ୍ବାଣ ପ୍ରମୁଖ ଯୋଗଦେଇ ଅଭିଯାନର ଶୁଭାରମ୍ଭ କରିଥିଲେ । ଏହି ଅବସରରେ ଜିଲ୍ଲାପାଳ ଶ୍ରୀ ଚହ୍ବାଣ ଉପସ୍ଥିତ ଜନସାଧାରଣ, ସ୍ୱେଚ୍ଛାସେବୀ ଓ ବିଭିନ୍ନ ସାମାଜିକ ସଂଗଠନର ସଦସ୍ୟମାନଙ୍କୁ ସ୍ୱଚ୍ଛତାର ଶପଥ ପାଠ କରାଇଥିଲେ । କାର୍ଯ୍ୟକ୍ରମରେ ଯୋଗଦେଇ ବିଧାୟକ ଶ୍ରୀ ତ୍ରିପାଠୀ ଏବଂ ଜିଲ୍ଲାପାଳ ସହରର ଝଣ୍ଡାଚୌକ ଓ ମନମୋହନ ପଡ଼ିଆଠାରେ ସ୍ୱଚ୍ଛକର୍ମୀ ଭାଇଭଉଣୀମାନଙ୍କ ସହ ମିଶି ହାତରେ ଝାଡ଼ୁ ଧରି ସଫେଇ କାର୍ଯ୍ୟରେ ସକ୍ରିୟ ଅଂଶଗ୍ରହଣ କରିଥିଲେ । ଏହି ଅବସରରେ ବିଧାୟକ ଶ୍ରୀ ତ୍ରିପାଠୀ କହିଥିଲେ ଯେ, ସ୍ୱଚ୍ଛତା କେବଳ ଏକ ଅଭିଯାନ ନୁହେଁ, ଏହା ଆମ ସମସ୍ତଙ୍କର ସାମାଜିକ ଦାୟିତ୍ୱ ଓ ନାଗରିକ କର୍ତ୍ତବ୍ୟ । ଏହି ସଂକଳ୍ପକୁ କେବଳ ଶପଥରେ ସୀମିତ ନରଖି ନିଜ ଦୈନନ୍ଦିନ ଜୀବନର ଅଭ୍ୟାସରେ ପରିଣତ କରିବାକୁ ସେ ଆହ୍ୱାନ ଜଣାଇଥିଲେ । ସମସ୍ତଙ୍କ ଛୋଟ ଛୋଟ ପ୍ରୟାସ ଓ ସାମୂହିକ ସହଭାଗିତା ହିଁ ଆମ ସ୍ୱପ୍ନର ସ୍ୱଚ୍ଛ, ସବୁଜ ଓ ସୁନ୍ଦର ଝାରସୁଗୁଡ଼ା ଗଠନରେ ସହାୟକ ହେବ ବୋଲି ସେ ମତବ୍ୟକ୍ତ କରିଥିଲେ । ଏହି ସ୍ୱଚ୍ଛତା ଅଭିଯାନ ପରେ ବିଧାୟକ ଶ୍ରୀ ତ୍ରିପାଠୀ ଓ ଜିଲ୍ଲାପାଳ ଶ୍ରୀ ଚହ୍ବାଣ ଆଗାମୀ ପବିତ୍ର ଛଟ୍ ପୂଜା ଏବଂ କାର୍ତ୍ତିକ ପୂର୍ଣ୍ଣିମା ଅବସରରେ ଶ୍ରଦ୍ଧାଳୁମାନଙ୍କ ସୁବିଧା ଓ ସୁରକ୍ଷାକୁ ଦୃଷ୍ଟିରେ ରଖି ଝାରସୁଗୁଡ଼ା ଟାଉନସ୍ଥିତ ମାରୱାଡ଼ି ତଲାବ ପରିଦର୍ଶନ କରିଥିଲେ । ପର୍ବପର୍ବାଣୀ ସମୟରେ ଶ୍ରଦ୍ଧାଳୁମାନଙ୍କ ପାଇଁ ତଲାବ ପରିସରରେ ପରିମଳ, ସ୍ୱଚ୍ଛତା, ଆଲୋକୀକରଣ, ସୁରକ୍ଷା ଏବଂ ଅନ୍ୟାନ୍ୟ ମୌଳିକ ସୁବିଧା ସୁନିଶ୍ଚିତ କରିବା ସହ ସମସ୍ତ ଆବଶ୍ୟକୀୟ କାର୍ଯ୍ୟ ସମୟୋଚିତ ଭାବେ ସମ୍ପନ୍ନ କରିବାକୁ ଉଭୟେ ବିଭାଗୀୟ ଅଧିକାରୀମାନଙ୍କ ସହ ସମୀକ୍ଷା କରିଥିଲେ । ପବିତ୍ର ପର୍ବଗୁଡ଼ିକ ଶାନ୍ତି, ଶୃଙ୍ଖଳା ଓ ଭକ୍ତିମୟ ପରିବେଶରେ ସମ୍ପନ୍ନ ହେବା ପ୍ରଶାସନର ସର୍ବୋଚ୍ଚ ପ୍ରାଥମିକତା ବୋଲି ବିଧାୟକ ପ୍ରକାଶ କରିଥିଲେ । ଆଜିର ଏହି ମହା ସ୍ୱଚ୍ଛତା ଅଭିଯାନରେ ସହରର ବହୁ ଯୁବବର୍ଗ, ସ୍ୱେଚ୍ଛାସେବୀ, ବିଭିନ୍ନ ସାମାଜିକ ସଂଗଠନର କର୍ମକର୍ତ୍ତା, ପୌର ପରିଷଦର ସ୍ୱଚ୍ଛକର୍ମୀ, ପ୍ରଶାସନିକ ଅଧିକାରୀ ଏବଂ ସାଧାରଣ ଜନତା ବିପୁଳ ସଂଖ୍ୟାରେ ସାମିଲ ହୋଇ ଅଭିଯାନକୁ ସଫଳ କରିଥିଲେ ।