ଭୁବନେଶ୍ୱର : ୨୦୧୯ ମସିହାରେ ମେ ମାସରେ ଓଡିଶାରେ ଗ୍ରୀଷ୍ମକାଳୀନ ବାତ୍ୟା “ଫନୀ” ସଂଘଠିତ ହୋଇଥିଲା । ଏହାକୁ ଦୃଷ୍ଟିରେ ରଖି ଗ୍ରୀଷ୍ମ ଋତୁ ପାଇଁ ଏବଂ ଆଗକୁ ମୌସୁମୀ ଋତୁକୁ ଆଖି ଆଗରେ ରଖି ଆଗକୁ ବିପର୍ଯ୍ୟୟ ମୁକାବିଲା ନିମନ୍ତେ ଗୁରୁବାର ଦିନ ଏକ ପ୍ରାକ୍ ପ୍ରସ୍ତୁତି ବୈଠକ ରାଜ୍ୟ ମୁଖ୍ୟ ଶାସନ ସଚିବ ଶ୍ରୀ ପ୍ରଦୀପ କୁମାର ଜେନାଙ୍କ ଅଧ୍ୟକ୍ଷତାରେ ଲୋକସେବା ଭବନ ଠାରେ ଆଭାସି ବ୍ୟବସ୍ଥା ମାଧ୍ୟମରେ ଅନୁଷ୍ଠିତ ହୋଇଯାଇଛି । ବୈଠକରେ ସମୀକ୍ଷା କରି ସମ୍ଭାବ୍ୟ ବାତ୍ୟା ବା ବନ୍ୟା ପରିପ୍ରେକ୍ଷୀରେ ସମସ୍ତ ପ୍ରକାର ପ୍ରସ୍ତୁତି କରିବାକୁ ସଂପୃକ୍ତ ବିଭାଗମାନକୁ ମୁଖ୍ୟ ଶାସନ ସଚିବ ଶ୍ରୀ ଜେନା ଆବଶ୍ୟକ ନିର୍ଦ୍ଦେଶ ଓ ପରାମର୍ଶ ଦେଇଛନ୍ତି । ବିଭିନ୍ନ ସ୍ଥାନରେ କେତେ ଟାଓ୍ୱାର ଆଲୋକ କାର୍ଯ୍ୟକ୍ଷମ ରହିଛି ତାହାର ତାଲିକା ପ୍ରସ୍ତୁତି, ଅଚଳ ଥିବା ଟାଓ୍ୱାର ଆଲୋକକୁ ଅପସାରଣ କରି ନୂତନ ଆଲୋକ ଲଗାଯିବା, ଏବି ବିଭିନ୍ନ ସ୍ଥାନରେ ଥିବା ଯନ୍ତ୍ରପାତି ଓ ଆନୁଷଙ୍ଗିକ ଉପକରଣର ମହଜୁଦ ସଂପର୍କରେ ୩ ଦିନ ମଧ୍ୟରେ ଦାଖଲ କରିବା ଉପରେ ସେ ସମନ୍ୱୟ ପାଇଁ ରାଜ୍ୟ ବିପର୍ଯ୍ୟୟ ପରିଚାଳନା କର୍ତ୍ତୃପକ୍ଷଙ୍କୁ ନିର୍ଦ୍ଦେଶ ଦେଇଛନ୍ତି । ପ୍ରତିବର୍ଷ ପରି ଚଳିତ ବର୍ଷ ମଧ୍ୟ ଆଗାମୀ ଜୁନ୍ ୧୯ରେ ବିପର୍ଯ୍ୟୟ ପରିଚାଳନା ପ୍ରସ୍ତୁତି ସଂପର୍କରେ ସବୁ ଜିଲ୍ଲାରେ ମକ୍ ଡ୍ରିଲ୍ ହେବ । କେବଳ ପୁରୀରେ ଜୁନ୍ ୨୦ ରେ ରଥ ଯାତ୍ରା ପଡୁଥିବାରୁ ଏହାର ପ୍ରସ୍ତୁତି ଯୋଗୁଁ ଏହି ଜିଲ୍ଲାରେ ଜୁନ୍ ୧୯ ରେ ମକ୍ ଡ୍ରିଲ୍ ନ ହୋଇ ପରବର୍ତ୍ତୀ ସମୟରେ ଏହା ଅନୁଷ୍ଠିତ ହେବ । ବାତ୍ୟା ମୁକାବିଲା ପରିପ୍ରେକ୍ଷୀରେ ନିୟନ୍ତ୍ରଣ କକ୍ଷ ୨୪ ଘଣ୍ଟିଆ ପରିଚାଳନା କରିବା ସହ ନଭେମ୍ବର ଶେଷ ପର୍ଯ୍ୟନ୍ତ ନିୟନ୍ତ୍ରଣ କକ୍ଷ ଖୋଲା ରଖିବାକୁ ସେ କହିଛନ୍ତି । ସମ୍ଭାବ୍ୟ ବନ୍ୟା ବା ବାତ୍ୟା ସମୟରେ ନିୟନ୍ତ୍ରଣ କକ୍ଷ ପରିଚାଳନା ଅବହେଳାକୁ ଆଦୌ ବରଦାସ୍ତ କରାଯିବ ନାହିଁ ବୋଲି ସେ ସତର୍କ କରିଛନ୍ତି । ସ୍ୱାସ୍ଥ୍ୟ ବିଭାଗ ତରଫରୁ ବିଶୁଦ୍ଧ ପାନୀୟ ଜଳ ଯୋଗାଣ ପାଇଁ ଯଥେଷ୍ଟ ସଂଖ୍ୟକ ହାଲୋଜେନ୍ ବଟିକା ମହଜୁଦ ରଖିବା, ସାପକାମୁଡା ଇଂଜେକ୍ସନ ମହଜୁଦ ରଖିବାକୁ ମୁଖ୍ୟ ଶାସନ ସଚିବ ନିର୍ଦ୍ଦେଶ ଦେଇଥିଲେ । ପ୍ରାରମ୍ଭରେ ରାଜ୍ୟ ରାଜସ୍ୱ ବିଭାଗ, ଜଙ୍ଗଲ ଓ ଜଳବାୟୁ ପରିବର୍ତ୍ତନ ତଥା ସ୍ୱତନ୍ତ୍ର ରିଲିଫ୍ କମିଶନର ଶ୍ରୀ ସତ୍ୟବ୍ରତ ସାହୁ ଯୋଗଦେଇ ବିପର୍ଯ୍ୟୟ ପରିଚାଳନା ପ୍ରସ୍ତୁତି ସମ୍ପର୍କରେ ସୂଚନା ଦେଇଥିଲେ । ଓଡିଶା ବିପର୍ଯ୍ୟୟ ପରିଚାଳନା କର୍ତ୍ତୃପକ୍ଷ ନିର୍ଦ୍ଦେଶକ ଶ୍ରୀ ଜ୍ଞାନ ଦାସ ଯୋଗଦେଇ ପାଓ୍ୱାର ପଏଣ୍ଟ ଉପସ୍ଥାପନା ମାଧ୍ୟମରେ ବାତ୍ୟା ମୁକାବିଲା ପ୍ରସ୍ତୁତି ସଂପର୍କରେ ସବିଶେଷ ତଥ୍ୟ ରଖିଥିଲେ । ସେହିପରି ଭାରତୀର ପାଣିପାଗ ବିଜ୍ଞାନ ବିଭାଗର ନିର୍ଦ୍ଦେଶକ ଉମାଶଙ୍କର ଦାସ ଚଳିତ ବର୍ଷ ପାଣିପାଗର ପୂର୍ବାନୁମାନ ସ୍ଥିତି ସମ୍ପର୍କରେ ଅବଗତ କରିବାତ୍ୟା ବା ପାଣିପାଗ ସତର୍କ ସୂଚନା ପ୍ରସାରଣ ପାଇଁ ବର୍ତ୍ତମାନର ବ୍ୟବସ୍ଥା, ଡିଜିଟାଲ ବ୍ୟବସ୍ଥା ମାଧ୍ୟମରେ ବାତ୍ୟା ସତର୍କ ସୂଚନା ଓ ପ୍ରସାରଣ ସ୍ଥିତି ସହିତ ପାରାଦୀପ, ଗୋପାଳପୁର, ସମ୍ବଲପୁର ଓ ବାଲେଶ୍ୱରରେ ଥିବା ଡପ୍ଲର ୱେଦର ରାଡାର (ଡିଡବ୍ଲ୍ୟୁଆର) ଷ୍ଟେସନ ଏବଂ ସ୍ୱୟଂଚାଳିତ ପାଣିପାଗ କେନ୍ଦ୍ର ଗୁଡିର କାର୍ଯ୍ୟସ୍ଥିତି ସମ୍ପର୍କରେ ସବିଶେଷ ତଥ୍ୟ ରଖିଥିଲେ । ଆସନ୍ତା ଦୁଇ ସପ୍ତାହ ମଧ୍ୟରେ ବଙ୍ଗୋପସାଗରରେ ଲଘୁଚାପ ଜନିତ ବାତ୍ୟା ସୃଷ୍ଟିର ସମ୍ଭାବନା ନାହିଁ ବୋଲି ସେ ପ୍ରକାଶ କରିଥିଲେ । ଆଗାମୀ ଦିନରେ ସମ୍ଭାବ୍ୟ ବାତ୍ୟା ପ୍ରସ୍ତୁତି ସଂପର୍କରେ ବିଭିନ୍ନ ବିଭାଗର ଉଚ୍ଚ କର୍ତ୍ତୃପକ୍ଷମାନେ ସେମାନଙ୍କର ପ୍ରସ୍ତୁତି ସଂପର୍କରେ ତଥ୍ୟ ରଖିଥିଲେ । ବୈଠକରେ ଅତିରିକ୍ତ ମହା ନିର୍ଦେଶକ, ଓଡ୍ରାଫ୍ ସୂଚନା ଦେଇଓଡ୍ରାଫ୍ ର ଜରୁରୀକାଳୀନ ଉପକରଣ ନିୟମିତ ଯାଂଚ କରାଯାଉଥିବା ସହ ଓଡ୍ରାଫ୍ ବାହିନୀର ବିଭିନ୍ନ ସ୍ଥାନକୁ ମୁତୟନ ପ୍ରସ୍ତୁତି ସଂପର୍କରେ ଅବଗତ କରିଥିଲେ । ଅଗ୍ନିଶମ ବିଭାଗ ଡି.ଆଇ.ଜି ଅଗ୍ମିଶମ ସେବା ବିଭାଗର ପ୍ରସ୍ତୁତି ସମ୍ପର୍କରେ ପ୍ରକାଶ କରିଥିବା ବେଳେ ତୃତୀୟ ବାଟାଲିୟନ , ଏନଡିଆରଏଫ ସେମାନଙ୍କର ରହିଥିବା ୧୭ ଟି ଟିମ୍ ମଧ୍ୟରୁ ମୁଣ୍ଡୁଳୀ ଠାରେ ୧୬ ଟି ଟିମ୍ ଅବସ୍ଥାପିତ ଥିବା ସ୍ଥଳେ ୧ ଟି ଟିମ୍ ବାଲେଶ୍ୱରରେ ଅବସ୍ଥାପିତ ରହିଥିବା ପ୍ରକାଶ କରିଥିଲେ । ବିପର୍ଯ୍ୟୟ ପରିଚାଳନା ପ୍ରସ୍ତୁତି ସମ୍ପର୍କରେ ସୂଚନା ଦେଇ ରାଜ୍ୟ ଉନ୍ନୟନ କମିଶନର ତଥା ଜଳ ସଂପଦ ବିଭାଗ ଅତିରିକ୍ତ ମୁଖ୍ୟ ଶାସନ ସଚିବ ଶ୍ରୀମତୀ ଅନୁ ଗର୍ଗ କହିଲେ ଯେ, ରାଜ୍ୟରେ ଥିବା ଜଳ ଭଣ୍ଡାରଗୁଡିକ ପରିଚାଳନା ଆମର ଅତ୍ୟନ୍ତ ଗୁରୁତ୍ୱପୂର୍ଣ୍ଣ । ଜଳ ସମ୍ପଦ ବିଭାଗ ତରଫରୁ ସମସ୍ତ ନଦୀବନ୍ଧ ସ୍ଥିତି ତଦାରଖ କରିବା , ସମ୍ଭାବ୍ୟ ବାତ୍ୟା ବା ବନ୍ୟା ପରିସ୍ଥିତିର ମୁକାବିଲା ପାଇଁ ନିର୍ଦ୍ଦିଷ୍ଟ ମାନକ ସଂଚାଳନ ପ୍ରକ୍ରିୟା (ଏସଓପି) ପାଳନ କରାଯାଉଥିବା ସଂପର୍କରେ ଶ୍ରୀମତୀ ଗର୍ଗ ପ୍ରକାଶ କରିଥିଲେ । ସ୍ୱାସ୍ଥ୍ୟ ବିଭାଗ ତରଫରୁ ପ୍ରାକ୍ ବାତ୍ୟା ବା ବନ୍ୟା ଓ ବିପର୍ଯ୍ୟୟ ପରବର୍ତ୍ତୀ ପଦକ୍ଷେପ ସଂପର୍କରେ ନିର୍ଦ୍ଦେଶ ନାମା ପ୍ରେରଣ କରାଯାଇଥିବା ସମ୍ପର୍କରେ ନିର୍ଦ୍ଦେଶକ(ଜନସ୍ୱାସ୍ଥ୍ୟ) ସୂଚନା ଦେଇଥିଲେ । ପଞ୍ଚାୟାତିରାଜ ଓ ପାନୀୟ ଜଳ ବିଭାଗ ତରଫରୁ ବାତ୍ୟା ପରବର୍ତ୍ତୀ ସମୟରେ ବିଶୁଦ୍ଧ ଜଳ ଯୋଗାଣ ପାଇଁ ଅତିରିକ୍ତ ବ୍ୟବସ୍ଥା ଗ୍ରହଣ କରାଯାଉଥିବା ବିଭାଗୀୟ ପ୍ରମୁଖ ଶାସନ ସଚିବ ଶ୍ରୀ ସୁଶୀଲ କୁମାର ଲୋହାନୀ ସୂଚନା ଦେଇଥିଲେ । ତେବେ କୂଅ, ନଳକୂପ ଆଦି ଜଳ ଉତ୍ସକୁ ବିଶୋଧନ କରିବା ପାଇଁ ଯଥେଷ୍ଟ ସଂଖ୍ୟକ ହାଲୋଜେନ୍ ଟାବଲେଟ୍ , ବ୍ଲିଚିଂ ପାଉଡର ବ୍ୟବସ୍ଥା କରିବା ସହ ଦୂଷିତ ହୋଇଥିବା ଜଳମଗ୍ନ ଅଂଚଳ ରେ ଜଳ ଯୋଗାଣ ପ୍ରକଳ୍ପର ଦ୍ରୁତ ପୁନଃ କ୍ଷମ କରାଯିବା ନେଇ ସଜାଗ ରହିବାକୁ ମୁଖ୍ୟ ଶାସନ ସଚିବ ନିର୍ଦ୍ଦେଶ ଦେଇଛନ୍ତି । ଏଥିପାଇଁ ଆବଶ୍ୟକ ସଂଖ୍ୟକ ଜେନେରେଟର, ମୋବାଇଲ ଜେନେରେଟର ବ୍ୟବସ୍ଥା ଓ ପାଣି ଟ୍ୟାଙ୍କର ବ୍ୟବସ୍ଥା ପାଇଁ ଆଗତୁରା ପଦକ୍ଷେପ ନେବାକୁ ମୁଖ୍ୟ ଶାସନ ସଚିବ ଗୁରୁତ୍ୱାରୋପ କରିଥିଲେ । ଜଙ୍ଗଲ ,ପରିବେଶ ଓ ଜଳବାୟୁ ପରିବର୍ତ୍ତନ ବିଭାଗ ତରଫରୁ ରାସ୍ତା, ଜଙ୍ଗଲ ରାସ୍ତା , ଆବର୍ଜନା ସଫା କରିବାର ବ୍ୟବସ୍ଥା ଏବଂ ପୂର୍ତ୍ତ ବିଭାଗ , ଗ୍ରାମ୍ୟ ଉନ୍ନୟନ ବିଭାଗ ତରଫରୁ ରାସ୍ତା ମରାମତି ଓ ପୁନଃନିର୍ମାଣ ପାଇଁ ପ୍ରସ୍ତୁତି ରହିବାକୁ ନିର୍ଦ୍ଦେଶ ଦିଆଯାଇଛି । ରାଜ୍ୟ ଗ୍ରାମ୍ୟ ଉନ୍ନୟନ, ଶକ୍ତି ଓ ସୂଚନା ଓ ଲୋକ ସଂପର୍କ ବିଭାଗ ପ୍ରମୁଖ ଶାସନ ସଚିବ ଶ୍ରୀ ସଂଜୟ କୁମାର ସିଂ ଯୋଗଦେଇ କହିଲେ ଯେ, ବାତ୍ୟା ସମୟରେ ବିଦ୍ୟୁତ୍ ସରବରାହ ନିରବଚ୍ଛିନ୍ନ ରଖିବା ପ୍ରମୁଖ ଆହ୍ୱାନ ହୋଇଥାଏ । ଏଥିପାଇଁ ବିଭାଗ ତରଫରୁ ମଧ୍ୟ ଏସଓପି ପ୍ରସ୍ତୁତ କାର୍ଯ୍ୟକାରୀ କରାଯାଉଥିବା ଶ୍ରୀ ସିଂ ପ୍ରକାଶ କରିଥିଲେ । ବାତ୍ୟା ସମୟରେ ଇଲେକ୍ଟ୍ରିକାଲ ଟାୱାର ଭାଙ୍ଗିଗଲେ ବାତ୍ୟା ହେଲେ ପ୍ରଭାବିତ ଅଞ୍ଚଳରେ ଶୀଘ୍ର ବିଦ୍ୟୁତଯୋଗାଣ ପୁନରୁଦ୍ଧାର ବ୍ୟବସ୍ଥା, ଆବଶ୍ୟକ ମାନବ ସମ୍ବଳ ପାଇଁ ତାଲିକା ପ୍ରସ୍ତୁତି , ଯନ୍ତ୍ରପାତିର ସାମଗ୍ରୀର ତାଲିକା ପ୍ରସ୍ତୁତ କରିବା ସଂପର୍କରେ ବିସ୍ତୃତ ଯୋଜନା କରିବାକୁ ବୈଠକରେ ଗୁରୁତ୍ୱ ଦିଆଯାଇଛି । ସେହିପରି ନଗର ଉନ୍ନୟନ ବିଭାଗ ତରଫରୁ ବିଏମସି ଏବଂ ସିଏମସି ତରଫରୁ ଆଗୁଆ ଡ୍ରେନ୍ ମରାମତି , ଜଳ ନିଷ୍କାସନ ବ୍ୟବସ୍ଥାକୁ ନିଶ୍ଚିତ କରିବା ,ଆସ୍କା ଲାଇଟ୍ , କଟର ମେସିନ୍ ପ୍ରସ୍ତୁତି ସଂପର୍କରେ ନିର୍ଦ୍ଦେଶ ଦିଆଯାଇଥିବା ନଗର ଉନ୍ନୟନ ବିଭାଗର ଅତିରିକ୍ତ ଶାସନ ସଚିବ ସୂଚନା ଦେଇଥିଲେ । ପେଟ୍ରୋଲ ପମ୍ପ ଦ୍ୱାରା ପର୍ଯ୍ୟାପ୍ତ ପରିମାଣର ପେଟ୍ରୋଲ ଓ ଡିଜେଲ ମହଜୁଦ ରଖିବା, ଓସଡମାକୁ ସମସ୍ତ ସରପଞ୍ଚ ବିଡିଓମାନଙ୍କ ସହିତ ଯୋଗାଯୋଗ ରଖାଯାଇ ବାତ୍ୟା ଓ ବନ୍ୟା ଆଶ୍ରୟସ୍ଥଳର ସ୍ଥିତି ଅନୁଧ୍ୟାନ ପାଇଁ ନିର୍ଦ୍ଦେଶ ଦିଆଯାଇଛି । ସେହିପରି ବାତ୍ୟା ପରେ ପରେ ପୋଖରୀ ଜଳ ଦୂଷିତ ହେବାକୁ ଆଶଙ୍କା କରି ଏ ଦିଗରେ ବିହୀତ ପଦକ୍ଷେପ ନେବାକୁ ମତ୍ସ୍ୟ ଓ ପ୍ରାଣୀ ସମ୍ପଦ ବିଭାଗକୁ ନିର୍ଦ୍ଦେଶ ଦିଆଯାଇଛି । ଗର୍ଭବତୀ ଓ ପ୍ରସୂତି ମହିଳା ମାନଙ୍କର ଯତ୍ନ ପରିପ୍ରେକ୍ଷୀରେ ମହିଳା ଓ ଶିଶୁବିକାଶ ବିଭାଗ ଏବଂ କୃଷି ଓ କୃଷକ ସଶକ୍ତିକରଣ ବିଭାଗ କୁ ମଧ୍ୟ ବନ୍ୟା ବା ବାତ୍ୟା ପରବର୍ତ୍ତୀ ପ୍ରସ୍ତୁତି ପାଇଁ ନିର୍ଦ୍ଦେଶ ଦିଆଯାଇଛି । ରାଜ୍ୟ ପୋଲିସ୍ ମହାନିର୍ଦ୍ଦେଶକ ଶ୍ରୀ ସୁନିଲ କୁମାର ବଂଶଲ ଯୋଗଦେଇ କହିଲେ ପ୍ରାକୃତିକ ବିପର୍ଯ୍ୟୟ ସମୟରେ ଓଡିଶା ପୁଲିସ୍ ସ୍ଥାନୀୟ ପୋଲିସ୍ ସହଯୋଗରେ ସର୍ବଦା ସରକାର ତଥା ଜନସାଧାରଣଙ୍କୁ ସହଯୋଗ ଦେଇଆସିଛି ଓ ଆଗାମୀ ଦିନରେ ମଧ୍ୟ ଅନୁରୂପ ଭାବେ ସହଯୋଗ ବଜାୟ ରଖିବ ବୋଲି ପ୍ରକାଶ କରିଥିଲେ । ବାତ୍ୟା ପରିସ୍ଥିତିରେ ଯୋଗାଯୋଗ ବ୍ୟବସ୍ଥାକୁ କାର୍ଯ୍ୟକ୍ଷମ ରଖିବା ପାଇଁ ଆଗୁଆ ବ୍ୟବସ୍ଥା ପାଇଁ ବିଏସଏନଏଲ କର୍ତ୍ତୃପକ୍ଷ ଏବଂ ଟେଲିକମ୍ ସେବା ପ୍ରଦାନକାରୀମାନଙ୍କୁ ସୂଚନା ଓ ପ୍ରଯୁକ୍ତି ବିଭାଗ ତରଫରୁ ନିର୍ଦ୍ଦେଶ ଦେବା, ଷ୍ଟାଣ୍ଡବାଇ ମୋବାଇଲ ଟାୱାର,ସେଲ୍ ଫୋନ୍ ଉପଭୋକ୍ତାଙ୍କୁ ଏସ୍ ଏମ୍.ଏସ୍ ସତର୍କସୂଚନା, ସେଲ୍ ଅନ୍ ହ୍ଵିଲ୍ସ ତାଲିକା ପ୍ରସ୍ତୁତ କରିବା ଏବଂ ଟେଲିକମ୍ ସେବା ପ୍ରଦାନକାରୀଙ୍କ ଦ୍ୱାରା ପ୍ରି-ପୋଜିସନ୍ ପାଇଁ ଯୋଜନା ସଂପର୍କରେ ଆଇଟି ବିଭାଗ ପ୍ରମୁଖ ଶାସନ ସଚିବ ଶ୍ରୀ ମନୋଜ କୁମାର ମିଶ୍ର ସୂଚନା ଦେଇଥିଲେ ।