ଭୁବନେଶ୍ୱର : ଗୁରୁବାର ଦିନ ମୁଖ୍ୟମନ୍ତ୍ରୀ “ଆମ ପୋଖରୀ” ଯୋଜନାର ଶୁଭାରମ୍ଭ କରିଛନ୍ତି । ଏହି ଯୋଜନା ହେଉଛି କେନ୍ଦ୍ରରେ ନରେନ୍ଦ୍ର ମୋଦିଙ୍କ ସରକାରର “ଅମୃତ ସରୋବର” ଯୋଜନାକୁ ହାଇଯାକ କରି ରାଜ୍ୟ ସରକାର ଆଉ ଏକ ନୂଆ ନାଆ ଦେଇ ‘ଆମ ପୋଖରୀ’ ଯୋଜନାଭାବେ ଶୁଭାରମ୍ଭ କରିଛନ୍ତି । ଏହି ଯୋଜନା ସମ୍ପୂର୍ଣ୍ଣଭାବେ କେନ୍ଦ୍ର ସରକାରଙ୍କ ଅର୍ଥରେ ହେବ । କେନ୍ଦ୍ର ସରକାରଙ୍କ ମନରେଗା (ମହାତ୍ମା ଗାନ୍ଧୀ ନିଶ୍ଚିତ କର୍ମନିଯୁକ୍ତି) ଯୋଜନାର ଥିବା ଅର୍ଥ ରାଶିରେ ହିଁ ‘ଆମ ପୋଖରୀ’ ଯୋଜନା ଚଳାଇବେ ରାଜ୍ୟ ସରକାର । ଏହି ଯୋଜନା ପାଇଁ ରାଜ୍ୟ ସରକାର ଟଙ୍କାଟିଏ ବି ନିଜ ବଜେଟ୍ରୁ ଖର୍ଚ୍ଚ କରିବେ ନାହିଁ ବରଂ କେନ୍ଦ୍ର ସରକାରଙ୍କ ବଜେଟ୍ରୁ ଏହି ଅର୍ଥ ଖର୍ଚ୍ଚ ହେବ ବୋଲି ବିଜେପି ରାଜ୍ୟ ଗଣମାଧ୍ୟମ ମୁଖ୍ୟ ଦିଲ୍ଲୀପ ମଲ୍ଲିକ କହିଛନ୍ତି । ରାଜ୍ୟ ସରକାର କେନ୍ଦ୍ର ସରକାରଙ୍କ ଯୋଜନାକୁ ବଦଳାଇ ନିଜ ନାଁରେ କରିବା ଅପରାଧ । ନବୀନ ବାବୁ ଏହି ଅପରାଧ ବାରମ୍ବାର କରୁଛନ୍ତି । ମୁଖ୍ୟମନ୍ତ୍ରୀ ୨୩ବର୍ଷ ହେଲା କେନ୍ଦ୍ରୀୟ ଯୋଜନାକୁ ହଡପ କରି ଓଡ଼ିଶାର ଲୋକଙ୍କୁ ଭୂଆଁ ବୁଲାଇ ଆସୁଛନ୍ତି । ‘ଆମ ପୋଖରୀ’ ଯୋଜନା ଅମୃତ ସରୋବର ଯୋଜନାର ଅଂଶ ବିଶେଷ । ମନରେଗା ଯୋଜନାରେ ଓଡ଼ିଶାକୁ ୨୬ହଜାର ୧୬୬କୋଟି ଟଙ୍କା କେନ୍ଦ୍ର ସରକାର ଦେଇଛନ୍ତି । ଅମୃତ ସରୋବର ଯୋଜନାରେ ଓଡିଶାରେ ୪୬୫୨ଟି ପୋଖରୀ ଖନନ ପାଇଁ କେନ୍ଦ୍ର ସରକାର ବ୍ୟୟ ବରାଦ କରିଛନ୍ତି । ଓଡିଶାରେ କାହିଁକି ଅମୃତ ସରୋବର ପୋଖରୀ ପୁନଃଉଦ୍ଧାର କାମ ସମୟ ଅବଧିଭିତରେ ସରୁନାହିଁ ତାହାର ଉତର ରଖନ୍ତୁ ମୁଖ୍ୟମନ୍ତ୍ରୀ । ରାଜ୍ୟ ସରକାର ପୁଣି ନୂଆ “ଆମ ପୋଖରୀ” ଯୋଜନା ନାଆରେ ଭୂଆଁ ବୁଲାଇବା ବନ୍ଦ କରନ୍ତୁ ବୋଲି ଶ୍ରୀ ମଲ୍ଲିକ କହିଛନ୍ତି । ଓଡିଶାର ଅନେକ ସହରାଞ୍ଚଳରେ ଭଲ ଭଲ ପୋଖରୀ ଥିଲା ଯାହାକୁ ବିଜୁ ଜନତା ଦଳ ସରକାର ରିୟଲଇଷ୍ଟେଟ, ଜମି ଜବରଦଖଲକାରୀଙ୍କ ହାତକୁ ଟେକି ଦେଲା, ଭୁବନେଶ୍ୱରରେ ମଧ୍ୟ ଅନେକ ପ୍ରାକୃତିକ ଜଳାଶୟ ଥିଲା । ସେସବୁ ପୋଖରୀ ଏବେ ଜବରଦଖଲରେ ରହିଛି ଓ ବିଜୁ ଜନତା ଦଳ ନେତା, ମନ୍ତ୍ରୀମାନେ ମାଡି ବସିବା ସହ ବ୍ୟବସାୟୀମାନେ ମାଡି ବସିଛନ୍ତି । ଏହି ପୋଖରୀ ଗୁଡିକ କେବେ ପୁନଃଉଦ୍ଧାର ହେବ ତାହାର ଜବାବ ରଖନ୍ତୁ ରାଜ୍ୟ ସରକାର । ରାଜ୍ୟ ସରକାର ଆମ ପୋଖରୀ ନାଁରେ କେନ୍ଦ୍ର ସରକାରଙ୍କ ଯୋଜନାକୁ ହଡପ କରିବାରୁ ନିଜକୁ ଦୂରେଇ ରଖନ୍ତୁ ବୋଲି ଶ୍ରୀ ମଲ୍ଲିକ କହିଛନ୍ତି ।