ଭୁବନେଶ୍ୱର : ସରକାରଙ୍କ ପକ୍ଷରୁ ଚଳିତ ଖରିଫ୍ ଧାନ କିଣାରେ ପ୍ରାୟ ଅଧିକାଂଶ ମଣ୍ଡିରେ ବ୍ୟାପକ ଅନିୟମିତତା ଓ ଦୁର୍ନୀତି ବଢ଼ିଚାଲିଛି । ସରକାର ଓ ପ୍ରଶାସନ ଜାଣି ଅଜଣା । ଚାଷୀ ଶୋଷଣର ଶିକାର ହେଉଥିବା ବେଳେ ବିଭାଗୀୟ ମନ୍ତ୍ରୀଙ୍କ ସଫେଇ ଚାଷୀକୁଳକୁ ବ୍ୟଥିତ କରିଛି । ଦୁର୍ନୀତିକୁ ହଟାଇବା ପରିବର୍ତେ ମନ୍ତ୍ରୀ ଦୁର୍ନୀତିକୁ ପ୍ରୋତ୍ସାହିତ କରୁଛନ୍ତି । ସରକାର ଧାନ କିଣିବା ପରିବର୍ତେ ବହୁ ଜାଗାରେ ମିଲରର ଏଜେଣ୍ଟ ମଣ୍ଡିରେ ଧାନ କିଣୁଛନ୍ତି । ନିୟନ୍ତ୍ରିତ ବଜାର କମିଟି ପକ୍ଷରୁ ଯୋଗାଇ ଦିଆଯାଇଥିବା ଧାନ କିଣା ମେସିନରେ ଜାଲିଆତି ଭାବେ ପ୍ରତି କ୍ୱିଂଟାଲରେ ୫ ରୁ ୭ କେଜି ଧାନ ଚାଷୀଙ୍କୁ ଠକାଯାଇଛି, ଯାହାର ଜ୍ୱଳନ୍ତ ପ୍ରମାଣ କଳାହାଣ୍ଡି ଜିଲ୍ଲା ଜୁନାଗଡ଼ ବ୍ଳକ ଅନ୍ତର୍ଗତ ଚିଚେଇଗୁଡ଼ା ମଣ୍ଡିରେ ଧାନ ଓଜନ ମାପ ଯନ୍ତ୍ରଦ୍ୱାରା ୧୦୦ରୁ ଉର୍ଦ୍ଧ୍ୱ ଚାଷୀଙ୍କଠାରୁ ୧୦ ହଜାର କ୍ୱିଂଟାଲ ଧାନ କିଣାଯାଇ ୨୫ ଲକ୍ଷ ଟଙ୍କାର ମହା ଦୁର୍ନୀତ କରାଯାଇଛି । ମିଲର, ପ୍ରଶାସନ ଓ ସରକାରଙ୍କ ମଧୁଚନ୍ଦ୍ରୀକାରେ ଧାନ କିଣାଯାଇ ଚାଷୀଙ୍କୁ ବ୍ୟାପକଭାବରେ ଶୋଷଣ କରାଯାଉଛି ବୋଲି ଆଜି ଓଡ଼ିଶା ପ୍ରଦେଶ କଂଗ୍ରେସ କମିଟି ସଭାପତି ଶରତ ପଟ୍ଟନାୟକଙ୍କ ନିର୍ଦ୍ଦେଶାନୁଯାୟୀ ପିସିସି କିଷାନ କଂଗ୍ରେସର ରାଜ୍ୟ ଅଧ୍ୟକ୍ଷ ଅମିୟ କୁମାର ପଟ୍ଟନାୟକଙ୍କ ନେତୃତ୍ୱରେ ଏକ ପ୍ରତିନିଧି ମଣ୍ଡଳୀ ରାଜଭବନଠାରେ ମାନ୍ୟବର ରାଜ୍ୟପାଳ ରଘୁବୀର ଦାସଙ୍କ ସହିତ ସାକ୍ଷାତ ଆଲୋଚନା କରି ଫେରାଦ ହେବା ସହ ଏହାର ଆଶୁ ପ୍ରତିକାର ପାଇଁ ରାଜ୍ୟପାଳଙ୍କୁ ୭ ଦଫା ସମ୍ବଳିତ ଏକ ଦାବୀପତ୍ର ପ୍ରଦାନ କରିଛନ୍ତି । ଅଧ୍ୟକ୍ଷ ଶ୍ରୀ ପଟ୍ଟନାୟକ କହିଛନ୍ତି ଯେ, ସରକାରଙ୍କ ପକ୍ଷରୁ ବ୍ୟବସ୍ଥିତ ଭାବେ ଧାନ ସଂଗ୍ରହ କରାଯାଉ ନାହିଁ । ଦୁର୍ଭାଗ୍ୟର କଥା, ପଶ୍ଚିମ ଓ ଦକ୍ଷିଣା ଅଞ୍ଚଳର ଜିଲ୍ଲାଗୁଡ଼ିକରେ ୧୫ ପ୍ରତିଶତରୁ ଉର୍ଦ୍ଧ୍ୱ ଧାନ ଚାଷୀଙ୍କଠାରୁ ବେପାରୀ ଶାଗମାଛ ମୂଲ୍ୟରେ କ୍ରୟ କରିସାରିବା ପରେ ସରକାର ବହୁ ବିଳମ୍ବରେ ଗତ ନଭେମ୍ବର ୨୧ ତାରିଖଠାରୁ ମଣ୍ଡିଖୋଲା ଆରମ୍ଭ କରିଛନ୍ତି । ଅନେକ ସ୍ଥାନରେ ମଣ୍ଡିର ଭିତ୍ତିଭୂମି ଅଭାବରୁ ଖୋଲା ଆକାଶ ତଳେ ହଜାର ହଜାର କ୍ୱିଂଟାଲ ଧାନ ଅସୁରକ୍ଷିତ ଭାବେ ପଡ଼ି ରହିଛି । ଅଧିକାଂଶ ମଣ୍ଡିରେ ବିଭିନ୍ନ ଆଳ ଦେଖାଇ ପ୍ରତି କ୍ୱିଂଟାଲରେ ଦୁଇ କେଜିରୁ ୧୦ କେଜି ପର୍ଯ୍ୟନ୍ତ ଧାନ କଟନୀ ଛଟନୀ କରାଯାଉଛି । ଧାନ କିଣାରେ ସରକାର ଯେଉଁ ଟୋକନ ବ୍ୟବସ୍ଥା କରିଛନ୍ତି, ଏଥିରେ ବହୁ ତୃଟି ପରିଲକ୍ଷିତ ହେଉଛି । ଲକ୍ଷ୍ୟଧାର୍ଯ୍ୟ ଅନୁଯାୟୀ ଟୋକନ ଅବଧି ସମୟରେ ଚାଷୀର ଧାନ କିଣାଯାଉ ନାହିଁ । ଯେଉଁ ଚାଷୀ ଟୋକନ ପାଇଛନ୍ତି, ସେମାନଙ୍କ ଧାନ ମଣ୍ଡିରେ ପଡ଼ି ରହିଥିବା ବେଳେ ଯେଉଁ ଚାଷୀର ଧାନ ଅମଳ ହେବାକୁ ଅଛି, ସେମାନଙ୍କ ପାଖକୁ ଟୋକନ ଆସୁଛି । ନିୟମ ମୁତାବକ ଚାଷୀ ବସ୍ତା ମୂଲ୍ୟ ପାଉନାହିଁ । ଧାର୍ଯ୍ୟ ଏମ.ଏସ.ପି.ଠାରୁ ଚାଷୀ ଅଣ୍ଡର ରେଟରେ ଧାନ ବିକିବାକୁ ବାଧ୍ୟ ହେଉଛନ୍ତି । ବର୍ତମାନ ଜଳସେଚିତ ଅ ଳରୁ ପ୍ରାୟ ୩୦ କ୍ୱିଂଟାଲ ଓ ଅଣ ଜଳସେଚିତ ଅଞ୍ଚଳରୁ ୨୦ କ୍ୱିଂଟାଲ ଅଧିକ ଧାନ ଅମଳ ହେଉଥିବା ବେଳେ ସରକାର ଜଳସେଚିତ ଅଞ୍ଚଳରୁ ଏକର ପିଚ୍ଛା ୧୯ କ୍ୱିଂଟାଲ ଓ ଅଣଜଳସେଚିତ ଅଞ୍ଚଳରୁ ୧୩ କ୍ୱିଂଟାଲ ଧାନ କିଣିବା ଫଳରେ ଆଉ ବଳକା ଧାନ ଚାଷୀ କରିବେ କଣ? ଏହା ଆମ ରାଜ୍ୟର ଚାଷୀଙ୍କ ପାଇଁ ଏକ ଅଭାବନୀୟ ପରିସ୍ଥିତି ସୃଷ୍ଟି ହେଉଛି । ଅନୁରୂପ ଭାବେ ଗତ ନଭେମ୍ବର ୫ ଓ ୬ ରିଖରେ ଲଘୁଚାପ ଜନିତ ବର୍ଷାଦ୍ୱାରା ଦକ୍ଷିଣ ପଶ୍ଚିମ ଓଡ଼ିଶାର ଅନେକ ଜିଲ୍ଲାରେ ଧାନ ଓ ପନିପରିବା ଫସଲ ବ୍ୟାପକଭାବେ ପ୍ରଭାବିତ ହୋଇଥିଲା । ଫସଲ କ୍ଷତିଗ୍ରସ୍ତ ଚାଷୀଙ୍କୁ ଏସ.ଆର.ସି.ଙ୍କ ପକ୍ଷରୁ ଗତ ମାସ ୧୨ ତାରିଖ ମଧ୍ୟରେ ଜିଲ୍ଲାପାଳମାନଙ୍କ ରିପୋର୍ଟ ପାଇବାପରେ କୃଷି ଇନପୁଟ୍ ସହାୟତା ନିର୍ଦ୍ଧାରିତ ସମୟରେ ଯୋଗାଇ ଦେବାକୁ ସରକାରଙ୍କ ପକ୍ଷରୁ ପ୍ରତିଶ୍ରୁତି ଦିଆଯାଇଥିଲା । କିନ୍ତୁ ଏହି ଦିଗରେ ଅଦ୍ୟାବଧି ଚାଷୀଙ୍କୁ ଫଟା ପାହୁଲାଟିଏ ସହାୟତା ଦିଆଯାଇ ନାହିଁ । ସେହିପରି ବର୍ତ୍ତମାନର ରାଜ୍ୟ ସରକାରଙ୍କ ୨୫ ବର୍ଷର ଶାସନକାଳରେ ପ୍ରତିଶ୍ରୁତି ମୁତାବକ ପ୍ରତି ବ୍ଳକ ସ୍ତରରେ ୩୫ ପ୍ରତିଶତ ଜଳସେଚନ ବ୍ୟବସ୍ଥାକୁ ସୁନିଶ୍ଚିତ କରାଯାଇ ନ ଥିବା ଯୋଗୁଁ ଫସଲହାନୀ, ଅଭାବୀ ବିକ୍ରି ଏବଂ ଠିକଣା ସମୟରେ କୃଷିଋଣ ନ ମିଳିବାରୁ ଘରୋଇ ଚଢ଼ାସୁଧ ଦ୍ୱାରା ୧୫ ହଜାରରୁ ଉର୍ଦ୍ଧ୍ୱ ଚାଷୀ ଆତ୍ମହତ୍ୟା କରିଛନ୍ତି । ନିକଟରେ ଯାଜପୁର, ନୟାଗଡ଼ ଏବଂ ବଲାଙ୍ଗୀର ଜିଲ୍ଲାରେ ଚାରିଜଣ ଚାଷୀ ଫସଲହାନୀ ଯୋଗୁଁ ଆତ୍ମହତ୍ୟା କରିଥିବା ବେଳେ ସରକାର ଏହି ଦିଗରେ ସମ୍ପୂର୍ଣ୍ଣ ଭାବରେ ନୀରବଦ୍ରଷ୍ଟା । ମୃତକ ଚାଷୀର ପରିବାରକୁ ସମବେଦନା ପ୍ରକାଶ କରିବା ପରିବର୍ତେ ଘରୋଇ କଳି ଯୋଗୁଁ ଚାଷୀ ଆତ୍ମହତ୍ୟା କରୁଥିବା ସରକାର ସ୍ଥାନୀୟ ପ୍ରଶାସନ ଜରିଆରେ ବାରମ୍ବାର ସଫେଇ ଦେଉଥିବା ଚାଷୀକୁଳକୁ ବହୁଳ ଭାବରେ ବ୍ୟଥିତ କରିଛି ବୋଲି କିଷାନ କଂଗ୍ରେସ ପକ୍ଷରୁ ଅଧ୍ୟକ୍ଷ ଶ୍ରୀ ପଟ୍ଟନାୟକ କହିଛନ୍ତି । ମାନ୍ୟବର ହାଇକୋର୍ଟଙ୍କ ନିର୍ଦ୍ଦେଶ ଓ ସରକାରଙ୍କ ପ୍ରତିଶ୍ରୁତି ମୁତାବକ ଚାଷୀଙ୍କଠାରୁ ସମସ୍ତ ବଳକା ଧାନ ସର୍ବନିମ୍ନ ସହାୟକ ମୂଲ୍ୟରେ କ୍ରୟ କରିବା ଓ ଏମ.ଏସ.ପି.କୁ ଆଇନଗତ ଗ୍ୟାରେଣ୍ଟି, ଟୋକନ ବ୍ୟବସ୍ଥା ସରଳୀକରଣ ସହିତ ଲକ୍ଷ୍ୟଧାର୍ଯ୍ୟ ମୁତାବକ ଧାନ କ୍ରୟ, ପ୍ରତି ମଣ୍ଡିରେ କଟନୀ ଛଟନୀ ସମ୍ପୂର୍ଣ୍ଣ ବନ୍ଦ, ରାଜ୍ୟ ସରକାରଙ୍କ ପକ୍ଷରୁ ପ୍ରତି କୁଇଣ୍ଟାଲ ଧାନରେ ଚାଷୀଙ୍କୁ ୬ଶହ ଟଙ୍କା ବୋନସ, ସୁବ୍ୟବସ୍ଥିତ ଢଙ୍ଗରେ ମଣ୍ଡି ପରିଚାଳନା କରାଯିବା ସହିତ ଅସାଧୁ ମିଲରମାନଙ୍କ ପ୍ରତି ଦୃଢ଼ କାର୍ଯ୍ୟାନୁଷ୍ଠାନ, ଲଘୁଚାପ ଜନିତ ଫସଲ କ୍ଷତିଗ୍ରସ୍ତ ଚାଷୀଙ୍କୁ ପ୍ରତି ଏକର ପିଚ୍ଛା ୨୫ ହଜାର ଟଙ୍କା କୃଷି ଇନପୁଟ୍ ସହାୟତା ପ୍ରଦାନ, ଫସଲହାନୀ, ଋଣବୋଝ, ଅଭାବୀ ବିକ୍ରି ଜନିତ ଚାଷୀ ଆତ୍ମହତ୍ୟା ଘଟଣାକୁ ସରକାର ସ୍ୱୀକାର କରିବା ସହ ମୃତ ଚାଷୀ ପରିବାରର କ୍ଷତି ପୂରଣ ପାଇଁ ସରକାରଙ୍କ ପକ୍ଷରୁ ୨୦ ଲକ୍ଷ ଅନୁକମ୍ପା ମୂଳକ ସହାୟତା ରାଶି ପ୍ରଦାନ କଂଗ୍ରେସ ପକ୍ଷରୁ ଦୃଢ଼ ଦାବୀ କରାଯାଇଛି । ଏହି ପ୍ରତିନିଧି ମଣ୍ଡଳୀରେ ଅନ୍ୟମାନଙ୍କ ମଧ୍ୟରେ ଚାଷୀନେତା ତୁଳେଶ୍ୱର ନାୟକ, ବୃନ୍ଦାବନ ଖଟେଇ, ଧ୍ରବୁଚରଣ ପରିଡ଼ା, ଗୁଣନିଧି ସାହୁ, ମଙ୍ଗୁ ଖିଲାର, ଦାସରଥି ସାହୁ, ପ୍ରଶାନ୍ତ ଜେନା, ନୂତନ ତ୍ରିପାଠୀ, ରଞ୍ଜନ କାଣ୍ଡି, ନିରଦ ବରଣ ଖୁଂଟିଆ, ଲିଙ୍ଗରାଜ ସାହୁ, ବଂଶୀଧର ନାୟକ, ବସନ୍ତ ମହାରଣା, ସଦାନନ୍ଦ ଓଝା ପ୍ରମୁଖ ଉପସ୍ଥିତ ଥିଲେ ।