ଭୁବନେଶ୍ୱର:ମଞ୍ଚେଶ୍ଵର ଥାନା ଅଧିକାରୀ ସୁଧୀର ସାହୁଙ୍କ ମାତ୍ରାଧିକ କାର୍ଯ୍ୟାନୁଷ୍ଠାନ, ପକ୍ଷପାତିତା ଏବଂ ଅନୈତିକ କାର୍ଯ୍ୟ ବିରୁଦ୍ଧରେ ରବିବାର ଦିନ ଛାତ୍ର କଂଗ୍ରେସ ପକ୍ଷରୁ ଭୁବନେଶ୍ୱର ଡି.ସି.ପିଙ୍କ କାର୍ଯ୍ୟାଳୟ ସମ୍ମୁଖରେ ସଭାପତି ୟାସୀର ନୱାଜଙ୍କ ନେତୃତ୍ୱରେ ଏକ ବିକ୍ଷୋଭ ଆୟୋଜିତ ହୋଇଥିଲା । ଛାତ୍ର କଂଗ୍ରେସର କର୍ମକର୍ତାମାନେ ଏକ ର୍ୟାଲିରେ ଆସି ଡି.ସି.ପି.ଙ୍କ କାର୍ଯ୍ୟାଳୟ ସମ୍ମୁଖରେ ମୁଖ୍ୟରାସ୍ତାକୁ ୧ ଘଣ୍ଟା ଧରି ଅବରୋଧ କରିଥିଲେ । ୟାସୀରଙ୍କ ନେତୃତ୍ୱରେ ଛାତ୍ର କଂଗ୍ରେସ କର୍ମୀମାନେ ଡି.ସି.ପି. ଅଫିସ ଭିତରକୁ ଧସେଇ ପସିଲାବେଳେ ଉପସ୍ଥିତ ପୋଲିସଙ୍କ ସହ ଧସ୍ତାଧସ୍ତି ହେଲା । ପ୍ରାୟ ଅଧଘଣ୍ଟା କାଳ ଧସ୍ତାଧସ୍ତି ପରେ ପୋଲିସ ଦାବୀପତ୍ର ଦେବାପାଇଁ ଏକ ପ୍ରତିନିଧି ଦଳ ଡି.ସି.ପିଙ୍କ କାର୍ଯ୍ୟାଳୟ ଯିବାକୁ ରାଜି ହୋଇଥିଲା । ଛାତ୍ର କଂଗ୍ରେସର ପ୍ରତିନିଧି ଦଳ ଡି.ସି.ପିଙ୍କ କାର୍ଯ୍ୟାଳୟରେ ଅତିରିକ୍ତ ଡି.ସି.ପି. ଶ୍ରୀ ପି.କେ ରାଉତଙ୍କୁ ଦାବିପତ୍ର ଦେବା ସହ ମଞ୍ଚେଶ୍ଵର ଥାନା ଅଧିକାରୀ ସୁଧୀର ସାହୁଙ୍କ ଅନୈତିକ କାର୍ଯ୍ୟ ବିରୁଦ୍ଧରେ ଅଭିଯୋଗ କରିଥିଲେ । ସ୍ମାରକ ପତ୍ରରେ ଉଲ୍ଲେଖ ହୋଇଥିଲା ଯେ ମଞ୍ଚେଶ୍ଵର ଥାନା ଅଧିକାରୀ ସାଧାରଣ ଜନତା ଓ ପୋଲିସର ସଂପର୍କକୁ ନଷ୍ଟ କରୁଛନ୍ତି । ଯାହା ଫଳରେ ସାଧାରଣ ଜନତାଙ୍କର ପୋଲିସ ଉପରୁ ଭରସା ତୁଟିଯିବ । ମଞ୍ଚେଶ୍ଵର ଥାନା ଅଧିକାରୀ ପ୍ରଦେଶ ଛାତ୍ର କଂଗ୍ରେସର ରାଜ୍ୟସ୍ତରୀୟ ସଂପାଦକ ଶ୍ରୀ ସଫଳ ସମନ୍ୱୟଙ୍କ ବିରୁଦ୍ଧରେ ମିଥ୍ୟା କେସ ଲଗାଇ ତାଙ୍କୁ ଗିରଫ କରିଛନ୍ତି । ଗତ ୧୮ ତାରିଖ ଅକ୍ଟୋବରରେ ମଞ୍ଚେଶ୍ଵର ଥାନା ଅଞ୍ଚଳରେ ଏକ ଅପରାଧିକ ଘଟଣାରେ ପୋଲିସ ତାଙ୍କୁ ଗିରଫ କରିଥିଲେ । ମାତ୍ର ଏହି ଘଟଣା ସହିତ କୌଣସି ସଂପର୍କ ନଥିବା ସଫଳ ସମନ୍ୱୟଙ୍କୁ ଅନ୍ୟାୟଭାବେ ଥାନାକୁ ଆଣି ମାଡ଼ ମାରିବା ସହ ଜେଲ ପଠେଇ ଦିଆଯାଇଛି । ଏହି ଅପରାଧିକ ଘଟଣାରେ ହଣାଖାଇଥିବା ଜଣେ ଦୋକାନୀ ଜେଲ ଦଣ୍ଡ ଭୋଗୁଥିବା ବେଳେ ହାଣିଇଥିବା ଲୋକ ଦିବା ଲୋକରେ ବୁଲୁଥିବା ବେଳେ ପୋଲିସ ସେମାନଙ୍କୁ ଗରିଫ କରୁନି । ସଫଳ ସମନ୍ୱୟ ଏକ ଦଳିତ ବର୍ଗର ପିଲା । ତାଙ୍କର ଗୁହାରୀକୁ ଥାନା ଅଧିକାରୀ ଶ୍ରୀ ସୁଧୀର ସାହୁ ଶୁଣିନଥିଲେ । ଶ୍ରୀ ସୁଧୀର ସାହୁ ମଞ୍ଚେଶ୍ଵର ଥାନା ଅଞ୍ଚଳରେ ଅପରାଧ କମେଇବା ବଦଳରେ ବଢ଼େଇ ଚାଲିଛନ୍ତି ବୋଲି ଛାତ୍ର କଂଗ୍ରେସ ଅଭିଯୋଗ କରିଛି । ଏଠାରେ ଅସାଧୁ ବ୍ୟବସାୟୀ, ନିଶା ବ୍ୟବସାୟୀ, ବେଆଇନ ମଦ କାରବାର କରୁଥିବା ଲୋକ, ଅସାଧୁ ବିଲଡର, ଅପରାଧୀ ଏପରିକି ବେଶ୍ୟାଳୟ ଚଳାଉଥିବା ବ୍ୟକ୍ତିଠାରୁ ଶ୍ରୀ ସୁଧିର ସାହୁ ଚାନ୍ଦା ନେଇ ସେଠାରେ ଅପରାଧର ସାମ୍ରାଜ୍ୟ ଖୋଲିଛନ୍ତି । ଯେଉଁମାନେ ଏ ଅନ୍ୟାୟ ବିରୁଦ୍ଧରେ ମୁହଁ ଖୋଲୁଛନ୍ତି ତାଙ୍କୁ ଜେଲରେ ଭର୍ତି କରିଦିଆଯାଉଛି । ଅତିରିକ୍ତ ଡିସିପି ଶ୍ରୀ ରାଉତ ଘଟଣାରେ ଅନୁଧ୍ୟାନ କରିବାପାଇଁ ପ୍ରତିଶୃତି ଦେଇଛନ୍ତି । ଡିସିପିଙ୍କ ଅନୁମୋଦନ କ୍ରମେ ଜଣେ ଅତିରିକ୍ତ ଡିସିପି ର୍ୟାଙ୍କର ଅଫିସରଙ୍କ ଦ୍ୱାରା ଘଟଣାର ତଦନ୍ତ କରାଯାଇ କାର୍ଯ୍ୟାନୁଷ୍ଠାନ ନିଆଯିବ ବୋଲି ସେ କହିଥିଲେ । ମଞ୍ଚେଶ୍ଵର ଥାନା ଅଧିକାରୀଙ୍କ ତୁରନ୍ତ ନିଲମ୍ବନ, ଅପରାଧିଙ୍କୁ ଗିରଫ ଏବଂ ଥାନା ଅଧିକାରୀଙ୍କ ବିରୁଦ୍ଧରେ ଦୃଢ଼ କାର୍ଯ୍ୟାନୁଷ୍ଠାନ ଦାବି କରାଯିବା ସହ ଛାତ୍ର କଂଗ୍ରେସ ସଂପାଦକ ସଫଳ ସମନ୍ୱୟଙ୍କ ବିରୋଧରେ ଲାଗିଥିବା ଦଫାକୁ ପ୍ରତ୍ୟାହାର କରାଯାଇ ତାଙ୍କୁ ଜେଲରୁ ମୁକ୍ତ କରାଯିବାକୁ ଦାବୀ କରିଛି । ଏହି କାର୍ଯ୍ୟକ୍ରମରେ ପିସିସି ସାଧାରଣ ସଂପାଦକ ରଜତ ଚୌଧୁରୀ, ପ୍ରକାଶ ମିଶ୍ର, ମନୋଜ ବିଶ୍ୱାଳ, ରଣଜିତ ପାତ୍ର, ତୁଷାରକାନ୍ତ ତପସ୍ୱୀ, ସୂରଜ ରାଉତ, ନିହାର ବେହେରା, ମୁନୁ ପରିଡ଼ା, ମହମ୍ମଦ ଗୁଲଫାମ, ବିଶ୍ୱଭୂଷଣ ମହାପାତ୍ର, ବିଭୂତି ଭୂଷଣ ମହାପାତ୍ର, ଅରମାନ ଜେନା, ସାଗର ପଟ୍ଟନାୟକ, ସମିଉଲ ହକ, ରିଆଜୁଲ ଇସ୍ଲାମ, ସୟଦ୍ ଅଜୁ, ସୟଦ ଆଜମ ଅଲ୍ଲି, ସୌମ୍ୟବ୍ରତ ଷଣ୍ଢ, ଉଦିତ ପ୍ରଧାନ, ରୋନକ ପଟ୍ଟନାୟକ, ନିତେଶ ବେହେରା, ରାଜଲକ୍ଷ୍ମୀ ସାହୁ, ସ୍ନେହା ଜେନା, ଅନନ୍ତ ସାମନ୍ତରାୟ, ସୌମ୍ୟ ବରାଳ ପ୍ରମୁଖ ଅଂଶଗ୍ରହଣ କରିଥିଲେ ।