ସିଟି ରିପୋର୍ଟର ଅନୀଲ ଶ୍ରୀରାମକାଙ୍କ ଠାରୁ
ସମ୍ବଲପୁର : ଭାରତୀୟ ସଂସ୍କୃତି ତଥା ବିଶ୍ୱର ଅନ୍ୟ ସଂସ୍କୃତିରେ ତୀର୍ଥଯାତ୍ରାର ବିଶେଷ ମହତ୍ତ୍ୱ ରହିଛି । ତୀର୍ଥଯାତ୍ରାକୁ ଏକ ଆଧ୍ୟାତ୍ମିକ ଏବଂ ଦିବ୍ୟ ଅନୁଭୂତି ଭାବରେ ବିବେଚନା କରାଯାଏ ଏବଂ ପୁରସ୍କାରର କାର୍ଯ୍ୟ ମଧ୍ୟ ଭାବରେ ବିବେଚନା କରାଯାଏ । ପ୍ରାଚୀନ କାଳରୁ ଭାରତୀୟ ସଂସ୍କୃତିର ବିବିଧତାକୁ ଏକାଠି ଓ ଅକ୍ଷୁଣ୍ଣ ରଖିବାରେ ତୀର୍ଥଯାତ୍ରା ବା ତୀର୍ଥଯାତ୍ରାର ପରମ୍ପରା ସର୍ବଦା ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିଆସିଛି ।
ତଦନୁଯାୟୀ ଓଡ଼ିଶା ସରକାରଙ୍କ ‘ବରିଷ୍ଠ ନାଗରିକ ତୀର୍ଥ ଯାତ୍ରା ଯୋଜନା’ ରାଜ୍ୟର ବରିଷ୍ଠ ନାଗରିକମାନଙ୍କୁ ରାଜ୍ୟର ସହଯୋଗରେ ଗୋଟିଏ ତୀର୍ଥ ଦର୍ଶନ (ତୀର୍ଥଯାତ୍ରା) କରିବାର ଜୀବନବ୍ୟାପୀ ସ୍ୱପ୍ନ ପୂରଣ କରିବା ଏବଂ ସେମାନଙ୍କ ଆଧ୍ୟାତ୍ମିକ ଆକାଂକ୍ଷା ପୂରଣ କରିବାର ଏକ ବଡ଼ ସୁଯୋଗ ପ୍ରଦାନ କରିଛି ।
ଏହାକୁ ଦୃଷ୍ଟିରେ ରଖି ଆଜି ସମ୍ବଲପୁର ଜଙ୍କସନ ରେଳ ଷ୍ଟେସନରେ ମୁଖ୍ୟମନ୍ତ୍ରୀ ଶ୍ରୀ ନବୀନ ପଟ୍ଟନାୟକ ଆଭାସୀ ମାଧ୍ୟମରେ ତୀର୍ଥଯାତ୍ରୀଙ୍କୁ ଶୁଭେଚ୍ଛା ଜଣାଇବାପରେ ଓଡିଶା ସରକାରଙ୍କ ବାଣିଜ୍ୟ ଓ ପରିଵହନ ମନ୍ତ୍ରୀ ଟୁକୁନି ସାହୁ ଉପସ୍ଥିତ ରହି ସବୁଜ ପତାକା ଦେଖାଇ ଶୁଭାରମ୍ଭ କରିଛନ୍ତି । ସକାଳ ସାଢ଼େ ୧୧ଟାରେ ୮ଟି ଜିଲ୍ଲାରୁ ୯୭୦ ଜଣ ତୀର୍ଥଯାତ୍ରୀ ୩୦ ଜଣ ଏସ୍କର୍ଟ ଅଫିସରଙ୍କ ସହ ଆଜମେର-ପୁଷ୍କର ଅଭିମୁଖେ ଯାତ୍ରା କରିଥିଲେ । ଏହି ୮ଟି ଜିଲ୍ଲା ହେଲା ସମ୍ବଲପୁର, ବରଗଡ଼, ବଲାଙ୍ଗୀର, ଝାରସୁଗୁଡ଼ା, ସୁନ୍ଦରଗଡ଼, ସୁବର୍ଣ୍ଣପୁର, ଦେବଗଡ଼ ଓ ଅନୁଗୁଳ। ସମ୍ବଲପୁରରୁ ୧୧୨, ବରଗଡ଼ରୁ ୧୫୯, ଦେବଗଡ଼ରୁ ୩୩, ଝାରସୁଗୁଡ଼ାରୁ ୬୨, ସୁନ୍ଦରଗଡ଼ରୁ ୨୨୫, ବଲାଙ୍ଗୀରରୁ ୧୭୭, ସୁବର୍ଣ୍ଣପୁରରୁ ୬୫ ଓ ଅନୁଗୁଳରୁ ୧୩୭ ଜଣ ତୀର୍ଥଯାତ୍ରୀ ଏହି ତୀର୍ଥଯାତ୍ରାପାଇଁ ଯାଉଛନ୍ତି ।
ବରିଷ୍ଠ ନାଗରିକଙ୍କ ଯାତ୍ରା ଖର୍ଚ୍ଚ, ରହିବା, ଖାଇବା ଓ ଅନ୍ୟାନ୍ୟ ଆନୁଷଙ୍ଗିକ ବ୍ୟବସ୍ଥା ଭଳି ସମସ୍ତ ପ୍ରକାର ସହାୟତା ଯୋଗାଇ ଦେଇଛନ୍ତି ସରକାର । ତୀର୍ଥଯାତ୍ରୀମାନଙ୍କୁ ଟ୍ରାଭେଲ କିଟ୍ ବ୍ୟାଗ ମଧ୍ୟ ଯୋଗାଇ ଦିଆଯାଇଥିଲା ଯେଉଁଠାରେ ଦୈନନ୍ଦିନ ଆବଶ୍ୟକୀୟ ସାମଗ୍ରୀ ରହିଛି ।
ଆନନ୍ଦମୟ ହୃଦୟରେ ତୀର୍ଥଯାତ୍ରୀମାନେ ବିଦାୟ ନେଇଥିଲେ । ସୂଚନା ଯେ ତୀର୍ଥଯାତ୍ରୀ ମାନେ ଆସନ୍ତା ୨୪ ଫେବୃଆରୀରେ ଆଜମିର -ପୁଷ୍କର ରୁ ଫେରିବାର କାର୍ଯ୍ୟକ୍ରମ ରହିଛି ।