ପ୍ରଥମ କିସ୍ତିରେ ଆସାମ ସରକାର ଦେବେ ୫୦ ଲକ୍ଷ ଟଙ୍କା

ସମ୍ବଲପୁରଠାରେ ବେଜବରୁଆଙ୍କ ସାଧନାଗୃହ ପୁନରୁଦ୍ଧାର ପାଇଁ

ଭୁବନେଶ୍ୱର: ପ୍ରସିଦ୍ଧ ଅହମୀୟା ସାହିତ୍ୟିକ ଲକ୍ଷ୍ମୀନାଥ ବେଜବରୁଆଙ୍କ ସମ୍ବଲପୁରସ୍ଥ ବାସଗୃହ ଓ ସାଧନାଗୃହର ପୁନରୁଦ୍ଧାର ପାଇଁ ଆସାମରେ କାର୍ଯ୍ୟରତ ବେଜବରୁଆ ସ୍ମୃତି-କମିଟିର ତିନି ଜଣ ସଦସ୍ୟ ଆଜି ପର୍ଯ୍ୟଟନ, ଓଡ଼ିଆ ଭାଷା, ସାହିତ୍ୟ ଓ ସଂସ୍କୃତି ମନ୍ତ୍ରୀ ଶ୍ରୀ ଜ୍ୟୋତିପ୍ରକାଶ ପାଣିଗ୍ରାହୀଙ୍କୁ ତାଙ୍କର ବିଧାନସଭା କକ୍ଷରେ ସୌଜନ୍ୟମୂଳକ ସାକ୍ଷାତ କରି ପୁନରୁଦ୍ଧାର କାର୍ଯ୍ୟ ସଂପର୍କରେ ଆଲୋଚନା କରିଥିଲେ ।

୨୦୧୭ ମସିହାରେ ମୁଖ୍ୟମନ୍ତ୍ରୀଙ୍କ ନିର୍ଦ୍ଦେଶକ୍ରମେ ଇନ୍‌ଟାକ୍‌ ଦ୍ୱାରା ପୁନରୁଦ୍ଧାର କାର୍ଯ୍ୟ ଜାରି ରହିଥିବାବେଳେ ଆସାମର ମୁଖ୍ୟମନ୍ତ୍ରୀ ସର୍ବାନନ୍ଦ ସୋନୱାଲ୍‌ ତାଙ୍କ ପକ୍ଷରୁ ପ୍ରଥମ କିସ୍ତିରେ ୫୦ ଲକ୍ଷ ଟଙ୍କା ପ୍ରଦାନ କରିବେ ବୋଲି ଘୋଷଣା କରିଛନ୍ତି । ସେମାନେ ଏହା ମନ୍ତ୍ରୀ ଶ୍ରୀ ପାଣିଗ୍ରାହୀଙ୍କୁ ଅବଗତ କରାଇଥିଲେ ।

ପ୍ରସିଦ୍ଧ ଅହମୀୟା ସାହିତ୍ୟିକ, ଆସାମ ଜାତୀୟ ସଙ୍ଗୀତର ରଚୟିତା ସ୍ୱର୍ଗତ ଲକ୍ଷ୍ମୀନାଥ ବେଜବରୁଆ ଆସାମରେ ଜନ୍ମ ହୋଇଥିଲେ ମଧ୍ୟ ତାଙ୍କ କର୍ମଭୂମି ଥିଲା ସମ୍ବଲପୁର ।

ପ୍ରାକ୍‌ ସ୍ୱାଧୀନତା କାଳରେ ସମ୍ବଲପୁରରେ ପ୍ରାୟ ୨୦ ବର୍ଷ ରହିବା ମଧ୍ୟରେ ସେହିଠାରେ ହିଁ ତାଙ୍କର ସୃଜନଶୀଳତାର ଉନ୍ମେଷ ଘଟିଥିଲା ।

ସମ୍ବଲପୁରର ମାଟି, ପାଣି, ପବନକୁ ନେଇ ସେ ସାହିତ୍ୟିକ ସର୍ଜନାର ଉତ୍କର୍ଷ ସ୍ତରରେ ପହଞ୍ଚି ପାରିଥିଲେ ।

ସେଥିପାଇଁ ଆସାମର ଜନତାଙ୍କ ପାଇଁ ସମ୍ବଲପୁର ଏକ ତୀର୍ଥଭୂମିରେ ପରିଣତ ହୋଇଛି ।

ସମ୍ବଲପୁରର ନେଲ୍‌ସନ୍‌ ମାଣ୍ଡେଲା ଛକ ନିକଟରେ ତାଙ୍କର ଦୁଇଗୋଟି ଗୃହ ଯଥା ସାଧନା ଗୃହ ଓ ବାସଗୃହକୁ ବେଜବରୁଆ ମେମୋରିଆଲ୍‌ କରିବା ପାଇଁ ୨୦୧୭ ମସିହାରେ ଆସାମ ସଂସ୍କୃତି ମନ୍ତ୍ରୀ ଓ ତାଙ୍କ ମୁଖ୍ୟମନ୍ତ୍ରୀଙ୍କ ମିଡ଼ିଆ ଆଡ୍‌ଭାଇଜର ମୁଖ୍ୟମନ୍ତ୍ରୀ ଶ୍ରୀ ନବୀନ ପଟ୍ଟନାୟକଙ୍କୁ ଭେଟି ସାକ୍ଷାତ-ଆଲୋଚନା କରିଥିଲେ ।

ଏହା ପରେ ମୁଖ୍ୟମନ୍ତ୍ରୀ ଶ୍ରୀ ପଟ୍ଟନାୟକ ୫୦ ଲକ୍ଷ ଟଙ୍କା ମଂଜୁର କରିଥିଲେ ଓ ଅବିକଳ ପୁରୁଣା ଢାଞ୍ଚାରେ ଦୁଇଟି ଗୃହକୁ ପୁନରୁଦ୍ଧାର କରିବା ପାଇଁ ଇନ୍‌ଟାକ୍‌କୁ ନିର୍ଦ୍ଦେଶ ଦେଇଥିଲେ ।

ପର୍ଯ୍ୟଟନ ବିଭାଗ ସୂତ୍ରରୁ ପ୍ରକାଶ, ଇନ୍‌ଟାକ୍‌ ସମୟାନୁଭିତ୍ତିକ କାର୍ଯ୍ୟ ଜାରି ରଖିଛି । ଆବଶ୍ୟକ ସ୍ଥଳେ ଡିସ୍‌ମେଣ୍ଟାଲିଂ, ନବୀକରଣ, ମରାମତି କାର୍ଯ୍ୟ ଚାଲୁରହିଛି ।

ଏଥିରେ ଆନନ୍ଦ ବ୍ୟକ୍ତ କରି ବେଜବରୁଆ ସ୍ମୃତି-କମିଟି ତାଙ୍କର ମୁଖ୍ୟମନ୍ତ୍ରୀଙ୍କର ଘୋଷଣା ସହ ଆଗାମୀ ଦିନରେ ଏହା ବେଜବରୁଆ ମୋମୋରିଆଲ୍‌ ଓ ଆସାମ-ଓଡ଼ିଆ ସାହିତ୍ୟ ସାଂସ୍କୃତିକ ବିନିମୟ ସ୍ଥଳର କେନ୍ଦ୍ରବିନ୍ଦୁ ହେବ ବୋଲି କହିଛନ୍ତି ।

ଯେହେତୁ ଆସାମରୁ ବହୁ ସଂଖ୍ୟକ ପର୍ଯ୍ୟଟକ ଏଠାକୁ ଆସୁଛନ୍ତି ଏହା ଓଡ଼ିଶାର ଏକ ଅନ୍ୟତମ ପର୍ଯ୍ୟଟନ ସ୍ଥଳୀ ହେବ ବୋଲି ସେମାନେ ମତପ୍ରକାଶ କରିଥିଲେ ।

ସାକ୍ଷାତ ଆଲୋଚନା ସମୟରେ ଅନ୍ୟମାନଙ୍କ ମଧ୍ୟରେ ପର୍ଯ୍ୟଟନ ବିଭାଗ ସଚିବ ଶ୍ରୀ ବିଶାଳ ଦେବ, ପର୍ଯ୍ୟଟନ ନିର୍ଦ୍ଦେଶକ ଶ୍ରୀ ନିର୍ମଳ ଚନ୍ଦ୍ର ମିଶ୍ର ଓ ଓଡ଼ିଆ ଭାଷା, ସାହିତ୍ୟ ଓ ସଂସ୍କୃତି ବିଭାଗ ନିର୍ଦ୍ଦେଶକ ଶ୍ରୀ ବିଜୟ କୁମାର ନାୟକ ଉପସ୍ଥିତ ଥିଲେ ।

  • ଏ ସଂସାରରେ କାହା ସହିତ କାହାର ସଂପର୍କ ଗଠନ ହୁଏ ଓ ବିଚ୍ଛେଦ ହୋଇଯାଏ ତାହା କାହାକୁ ଆନନ୍ଦର ସୁଖ ପ୍ରଦାନ କରି ପରେ ବିରହର ଦୁଃଖରେ ଜର୍ଜରିତ କରିଥାଏ ଏବଂ ଅପ୍ରତ୍ୟାଶିତ ଭାବେ ଏପରି ଘଟିଯାଏ ତାହା କେହି...
  • କେତେବେଳେ ଦୁଃଖ ଆସେ, କେତେବେଳେ ସୁଖ ଆସେ, ଏହି ସବୁ ଅନୁଭୂତି ମନୁଷ୍ୟ ଜୀବନରେ ବାରମ୍ବାର ଘଟିଥାଏ । କିନ୍ତୁ ଏପରି ଏକ ଅନୁଭୂତି ଯାହାକି ପୂର୍ବରୁ କେବେ ଅନୁଭବ କରିନଥିବେ କି କେବେ ଘଟିବ ବୋଲି ଆଶା କରିନଥିବେ,...
  • ଜୀବନରେ ବେଳେବେଳେ ଏପରି ଅପ୍ରତ୍ୟାଶିତ ଘଟଣା ଘଟେ, ତାହା ଆଶ୍ଚର୍ଯ୍ୟମୟ ହୋଇଥାଏ । ସୁବ୍ରତଙ୍କର ଜୀବନରେ ଏପରି ଏକ ଘଟଣା ଘଟିବ ବୋଲି ସେ କେବେ କଳ୍ପନା କରିପାରିନଥିଲେ ? କିଛି ବର୍ଷ ପୂର୍ବେ ସେ ତରୁଣୀ ସୁପ୍ରିୟାର ସଂସ୍ପର୍ଶରେ...
  • ଜୀବନରେ ଅଚାନକ ଏପରି କେତେକ ଘଟଣା ଘଟିଯାଏ, ଯାହା ଅତ୍ୟନ୍ତ ମର୍ମସ୍ପର୍ଶୀ ଓ ହୃଦୟ ବିଦାରକ ହୋଇଥାଏ । ଭଗବାନ କେତେବେଳେ କାହାକୁ କାହା ସହିତ ପ୍ରେମ ବନ୍ଧନରେ ଆବଦ୍ଧ କରି ଓ ବିଚ୍ଛିନ୍ନ କରାଇ ଦିଅନ୍ତି ଓ ପ୍ରେମର...
  • ଅନ୍ତରର ଅନୁଭବ ହୃଦ କରିଥାଏ । ଚକ୍ଷୁ ଓ ମନ ହୃଦୟଦ୍ୱାରା ନିୟନ୍ତ୍ରିତ ହୋଇଥାଏ । ଅନ୍ୟର ଦୁଃଖ ହୃଦୟ ସହି ପାରିନଥାଏ । ସେହିପରି ଏକ ସୁନ୍ଦରୀ ତରୁଣୀର ଆକର୍ଷଣ ମଧ୍ୟ ହୃଦୟ ମଧ୍ୟକୁ ପ୍ରବେଶ କରି ତା...

RELATED BY