ସମ୍ବଲପୁର : ବିଜେଡି ନେତା ତଥା ସମ୍ବଲପୁର ଲୋକସଭା ପ୍ରାର୍ଥୀ ପ୍ରଣବ ପ୍ରକାଶ ଦାସ ମୁଖ୍ୟମନ୍ତ୍ରୀଙ୍କ ବିବଶତାକୁ ଦେଖି ମଧ୍ୟ ଆଖି ବୁଜି ଦେଇଛନ୍ତି ବୋଲି କହିଛନ୍ତି ବିରୋଧୀ ଦଳ ନେତା ତଥା ସମ୍ବଲପୁର ବିଧାୟକ ପ୍ରାର୍ଥୀ ଜୟ ନାରାୟଣ ମିଶ୍ର ।
ଶ୍ରୀ ମିଶ୍ର କହିଛନ୍ତି ଯେ ଗୁମାସ୍ତାଙ୍କୁ ଖୁସି କରିବା ପାଇଁ ମିଛ କଥା କହି ବିଜେଡି ନେତା ପ୍ରଣବ ଓଡ଼ିଶାର ଜନସାଧାରଣଙ୍କୁ ଭ୍ରମିତ କରୁଛନ୍ତି । ମୁଖ୍ୟମନ୍ତ୍ରୀ ଆଜି କେଉଁ ଅବସ୍ଥାରେ ଅଛନ୍ତି, ତାହା ସେ ଭଲ ଭାବରେ ଜାଣିଛନ୍ତି । ମୁଖ୍ୟମନ୍ତ୍ରୀ ଭିଡିଓରେ ଥିବା ବେଳେ ତାଙ୍କର ଗୁମାସ୍ତା କଣ୍ଟ୍ରୋଲ କରୁଛନ୍ତି । ଓଡ଼ିଶାର ଗଣତନ୍ତ୍ରକୁ ଚାପି ଦେବା ପାଇଁ ଚେଷ୍ଟା କରୁଛନ୍ତି । ତେବେ ଏ ସବୁ ଦେଖି ସ୍ୱର ଉଠାଇବା ପରିବର୍ତ୍ତେ କ୍ରୀତଦାସ ହୋଇ ପ୍ରଣବ ଜାଣି ଅଜଣା ହେବା ଦେଖି ଆମକୁ ଦୁଃଖ ଲାଗୁଛି ।
ମା’ ସମଲେଶ୍ୱରୀ ମନ୍ଦିର ବାବଦରେ ଶ୍ରୀ ଦାସଙ୍କ ଜ୍ଞାନ କମ ରହିଛି । ଯେଉଁ ବିଷୟରେ ଜ୍ଞାନ କମ, ସେ ବିଷୟରେ କହିବା ଅନୁଚିତ୍ । ବିଜେପି କେବେ ବିକାଶର କାମକୁ ବିରୋଧ କରିନାହିଁ, କିନ୍ତୁ ବିକାଶ ଓ ସୌନ୍ଦର୍ଯ୍ୟକରଣ ନାଁରେ ହଜାର ହଜାର ବର୍ଷର ଐତିହ୍ୟ, କୀର୍ତ୍ତିରାଜିକୁ ନଷ୍ଟ କରିବା ଭଳି କାମକୁ ବିଜେପି ବିରୋଧ କରେ । ସମ୍ବଲପୁରରେ ମିଛ କଥାକୁ ପ୍ରଚାର କରି ମୂଳ ପ୍ରଶ୍ନର ଉତ୍ତର ନଦେବା ତାଙ୍କ ରାଜନୈତିକ ଅପରିପକ୍ୱତାର ପରିଚୟ ।
ବିଜେଡି ଗୁମାସ୍ତା ଲୋକଙ୍କୁ ଭୂଆଁ ବୁଲାଇବା ପାଇଁ ଚେଷ୍ଟା କରୁଛନ୍ତି । ସନ୍ଥ କବି, ସ୍ୱଭାବ କବି ମଧ୍ୟରେ ଯେ ପ୍ରାର୍ଥକ୍ୟ ଜାଣିପାରୁନାହାନ୍ତି ସେ କ’ଣ ପ୍ରଶ୍ନ କରିବେ ? କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କ ବିକାଶର କାମ ବାରମ୍ବାର ରଖିଲା ପରେ ମଧ୍ୟ ଗୁମାସ୍ତାଙ୍କ କଥାରେ ନେତାମାନେ ସେହି ବାରମ୍ବାର କଥା କହୁଛନ୍ତି । ଏନଏଚ-୫୫ର ୯୫ ପ୍ରତିଶତ କାମ ଶେଷ ହୋଇଥିବା ବେଳେ ବାକି କାମ ତୁମ ସରକାରଙ୍କ ଅସହୋଯୋଗ ଓ ଷଡଯନ୍ତ୍ର କାରଣରୁ ହୋଇପାରୁନାହିଁ । ଜଙ୍ଗଲ କ୍ଲିୟରାନ୍ସ, ଜମି ଅଧିଗ୍ରହଣ ନେଇ ତୁମ ସରକାର ୪ ବର୍ଷ ବିଳମ୍ବ କରିଛନ୍ତି । ବିଗତ ୫ ବର୍ଷ ହେବ ଓଡ଼ିଶାରେ ଗୋଟିଏ ବି କ୍ୟାବିନେଟ୍ ବୈଠକରେ ମହାନଦୀ ପ୍ରସଙ୍ଗ ସମ୍ପର୍କରେ ଆଲୋଚନା ହୋଇଛି କି? ନବୀନ ବାବୁ ମହାନଦୀ ପ୍ରସଙ୍ଗରେ ଓଡ଼ିଶାର କିଛି କ୍ଷତି ହେବ ନାହିଁ ବୋଲି ବିଧାନସଭାରେ ଉତ୍ତର ରଖିଥିଲେ । ମୌସୁମୀ ସମୟରେ ମହାନଦୀରେ ଯେତିକି ପାଣି ବହିଯାଉଛି, ସେତିକି ପାଣିକୁ ରଖିବା ପାଇଁ କ’ଣ ବ୍ୟବସ୍ଥା କରିଛନ୍ତି ? ମହାନଦୀ ବିବାଦର ସମଧାନ ପାଇଁ ଛତିଶଗଡ଼ ସହ ସର୍ବଦଳୀୟ ବୈଠକ ପାଇଁ ଆମ ନେତା ଧର୍ମେନ୍ଦ୍ର ପ୍ରଧାନ ମୁଖ୍ୟମନ୍ତ୍ରୀଙ୍କୁ ଅନେକ ଥର ଚିଠି ଲେଖିବା ପରେ ସେ ଆସିଲେ ନାହିଁ କାହିଁକି ?
ଦୀର୍ଘ ୨୫ ବର୍ଷର ବିଜେଡି ସରକାରରେ ରାଜ୍ୟରେ ପାନୀୟ ଜଳ, ଜଳସେଚନ, ଶିକ୍ଷା, ସ୍ୱାସ୍ଥ୍ୟସେବା, ଦାଦନ ସମସ୍ୟା ଚିନ୍ତାଜନକ । ଏଥିପାଇଁ ତୁମକୁ ପରାଜୟର ଭୟ ଘାରିଛି । ଜୁନ ୪ରେ ବିଜେଡିର ଏକ୍ସପାଏରୀ ଡେଟ୍ ବୋଲି ପ୍ରଧାନମନ୍ତ୍ରୀ କହିଛନ୍ତି । ଏଥର ଓଡ଼ିଶାରେ ଓଡ଼ିଆ ଲୋକଙ୍କ ସରକାର ହେବ । ଓଡ଼ିଆ ଲୋକ ମୁଖ୍ୟମନ୍ତ୍ରୀ ଶପଥ ନେବ ବୋଲି ଶ୍ରୀ ମିଶ୍ର କହିଛନ୍ତି ।